उज्यालो नेपाल पार्टीभित्र विभाजनको संकेत, रास्वपा प्रवेशले बढायो तनाव

कुसुम शर्मा
यूके नेपाल प्रेस
बेलायत ,१८ पौष, २०८२ शुक्रवार—उज्यालो नेपाल पार्टीभित्र नेतृत्व र राजनीतिक दिशाबारे गम्भीर असन्तुष्टि सतहमा आएको छ। पार्टीका संरक्षक रहेका कुलमान घिसिङ राष्ट्रिय स्वतन्त्र पार्टी (रास्वपा) को समानुपातिक सूचीमा तेस्रो वरियतामा सीमित भएपछि पुरानो दलभित्र असन्तोष चुलिएको देखिएको हो।

यसै सन्दर्भमा, उज्यालो नेपाल पार्टीका पूर्व प्रमुख अनुपकुमार उपाध्यायले पार्टीका तर्फबाट नयाँ समानुपातिक बन्दसूची दर्ता गराउने प्रयास गरेका छन्। शुक्रबार अपराह्न उपाध्याय १ सय १० जना उम्मेदवारको बन्दसूची बोकेर निर्वाचन आयोग पुगेका थिए। तर समानुपातिक सूची पेश गर्ने कानुनी समयसीमा सकिइसकेको भन्दै आयोगले सूची दर्ता गर्न अस्वीकार गरेको जनाएको छ।

निर्वाचन आयोग स्रोतका अनुसार उपाध्याय एक सहकर्मीका साथ अपराह्न करिब ३ बजे आयोग पुगेका थिए। उनीहरूले समानुपातिक सूची दर्ताका लागि आवश्यक ५० हजार रुपैयाँ समेत बुझाइसकेको दाबी गर्दै आयोगका अधिकारीहरूलाई मनाउने प्रयास गरेका थिए। तर समयसीमा नाघिसकेको कारण सूची स्वीकार गर्न नसकिने स्पष्ट जवाफ दिइएको स्रोतले जनाएको छ।

अनुपकुमार उपाध्यायको नाम भने रास्वपाको समानुपातिक उम्मेदवार सूचीमा समावेश छ। पुस १४ गते रास्वपा सभापति रवि लामिछानेसँग भएको सातबुँदे सहमतिमा पनि उपाध्यायकै हस्ताक्षर रहेको छ।

राजनीतिक विश्लेषकहरूका अनुसार यो घटनाक्रमले नयाँ दलहरूभित्रको संगठनात्मक अस्थिरता, नेतृत्वप्रति असन्तुष्टि र पार्टी एकताका चुनौतीहरूलाई उजागर गरेको छ। आगामी निर्वाचनको तयारीकै बीच देखिएको यो विवादले उज्यालो नेपाल पार्टी र रास्वपाबीचको सम्बन्धमा थप जटिलता ल्याउन सक्ने आँकलन गरिएको छ।