कांग्रेस महाधिवेशन २०८३ वैशाख २८–३१ मा, केन्द्रीय कार्यसमितिको म्याद पनि थप

कुसुम शर्मा
यूके नेपाल प्रेस
बेलायत ,१८ पौष, २०८२ शुक्रवार—नेपाली कांग्रेसको केन्द्रीय कार्यसम्पादन समितिले आगामी २०८३ वैशाख अन्तिम साता पार्टीको १५औँ महाधिवेशन आयोजना गर्ने निर्णय गरेको छ। पार्टी कार्यालय सानेपामा शुक्रबार बसेको बैठकले चुनावपछि महाधिवेशन गर्ने प्रस्ताव बहुमतले पारित गरेको हो।

कार्यवाहक सभापति पूर्णबहादुर खड्काले प्रस्तुत गरेको कार्यतालिकाअनुसार कांग्रेसको १५औँ महाधिवेशन २०८३ वैशाख २८ देखि ३१ गतेसम्म काठमाडौँमा हुनेछ। यसअघि यही पुस महिनामा प्रस्ताव गरिएको कार्यतालिका विभिन्न राजनीतिक र संगठनात्मक कारणले कार्यान्वयन हुन नसकेपछि परिमार्जनसहित पुनः अनुमोदन गरिएको हो।

पार्टी प्रवक्ता प्रकाशशरण महतका अनुसार बैठकले केन्द्रीय कार्यसमितिको कार्यकाल आगामी जेठ मसान्तसम्म थप्ने निर्णय पनि गरेको छ। यसअघि मंसिर १५ गतेको बैठकले समितिको म्याद माघ मसान्तसम्म बढाएको थियो। महतले विधानअनुसार तल्ला तहका पार्टी समितिहरूको म्याद पनि स्वतः थप हुने स्पष्ट पारे।

यद्यपि बैठकको यो निर्णय सर्वसम्मत भने रहेन। महामन्त्रीद्वय गगनकुमार थापा र विश्वप्रकाश शर्मासहित केही नेताहरूले निर्णयप्रति असहमति जनाएका छन्। उनीहरूले विशेष महाधिवेशन आह्वान गर्नुपर्ने माग गर्दै १४औँ महाधिवेशनका प्रतिनिधिहरूलाई तयारीमा रहन आग्रह गरेका छन्।

पार्टीभित्रको यो मतभेदले आगामी महाधिवेशनको समय र प्रक्रिया कांग्रेसभित्र थप बहसको विषय बन्न सक्ने संकेत गरेको छ।