चीन भ्रमणमा प्रधानमन्त्री ओली : कूटनीति, आलोचना र संभावनाहरू

शिव कुमार ढकाल
बेलायत – प्रधानमन्त्री केपी शर्मा ओली चीनको तियानजिनमा हुने शाङ्घाई सहयोग संगठन (एससीओ) शिखर सम्मेलनमा सहभागी हुन आज बिहान चीन प्रस्थान गरेका छन्। उनी बिहान करिब ७ बजे त्रिभुवन अन्तर्राष्ट्रिय विमानस्थलबाट उच्चस्तरीय प्रतिनिधि मण्डलसहित प्रस्थान गरेका हुन्।

यसपटकको भ्रमणमा प्रधानमन्त्री ओलीले चीनका राष्ट्रपति सी चिनफिङ, रुसका राष्ट्रपति भ्लादिमिर पुटिनसहित कम्तीमा ६ मुलुकका सरकार प्रमुखहरूसँग द्विपक्षीय वार्ता गर्ने कार्यक्रम छ। साथै उनले भदौ १६ गते हुने ‘एससीओ प्लस’ शिखर सम्मेलनलाई सम्बोधन गर्ने तय भएको छ, जहाँ क्षेत्रीय सुरक्षा, आर्थिक सहकार्य र पूर्वाधारसम्बन्धी मुद्दामा छलफल हुने अपेक्षा गरिएको छ।

यद्यपि, प्रधानमन्त्रीको यो भ्रमणलाई लिएर देशभित्र विभिन्न प्रतिक्रिया देखिएका छन्। समर्थकहरूले यसलाई नेपाललाई अन्तर्राष्ट्रिय मञ्चमा परिचित गराउने अवसरका रूपमा लिएका छन्। तर आलोचकहरू भन्छन्, विगतमा पनि यस्ता उच्चस्तरीय भ्रमणहरूले ठूलो प्रचार त पाएको छ, तर ठोस नतिजा र दीर्घकालीन फाइदा भने आम नागरिकसम्म पुगेको छैन।

प्रधानमन्त्रीसँगै उनकी पत्नी राधिका शाक्य, पूर्व उपप्रधानमन्त्री तथा प्रतिनिधिसभा सदस्य पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री तथा प्रधानमन्त्रीका आर्थिक सल्लाहकार डा. युवराज खतिवडा, पूर्वमन्त्री एवं सांसद छविलाल विश्वकर्मा लगायत वरिष्ठ सरकारी अधिकारीहरू टोलीमा सहभागी छन्।

विशेषगरी राष्ट्रपति सी चिनफिङसँगको भेटलाई कूटनीतिक दृष्टिले महत्वपूर्ण मानिएको छ। चीनसँगको सम्बन्धलाई थप प्रगाढ बनाउन सकिने अवसर भए पनि नेपालले विगतमा प्रतिबद्धताहरूलाई कार्यान्वयनमा ल्याउन असफल भएको भन्दै केही विश्लेषकहरूले यसपटक पनि ठोस उपलब्धि नआउने आशंका व्यक्त गरेका छन्।

प्रधानमन्त्री ओली भदौ १८ गते राति करिब १०:३० बजे स्वदेश फर्कने कार्यक्रम छ।