सभामुख देवराज घिमिरे र उपसभामुख इन्दिरा रानामगरको कार्यकाल औपचारिक रूपमा समाप्त

कुसुम शर्मा
यूके नेपाल प्रेस
बेलायत ,१३ पौष, २०८२ आइतवार—प्रतिनिधिसभाका सभामुख देवराज घिमिरे र उपसभामुख इन्दिरा रानामगरको कार्यकाल आइतबार रातिदेखि औपचारिक रूपमा समाप्त भएको छ। संविधानको धारा ९१(६) मा उल्लेखित व्यवस्थाअनुसार उनीहरूको पदावधि सकिएको हो।

भदौ २७ गते प्रतिनिधिसभा विघटन भए पनि संवैधानिक प्रावधानका कारण सभामुख र उपसभामुख पदमा कायम रहन पाउने व्यवस्था गरिएको थियो। तर प्रतिनिधिसभाका लागि हुने आगामी निर्वाचनको उम्मेदवारी दर्ता हुने अघिल्लो दिनसम्म मात्र उनीहरू पदमा रहन सक्ने व्यवस्था संविधानमा छ।

संविधानको धारा ९१(६) मा भनिएको छ, ‘प्रतिनिधि सभा विघटन भएको अवस्थामा आफ्नो पदमा बहाल रहेका प्रतिनिधि सभाका सभामुख र उपसभामुख प्रतिनिधि सभाका लागि हुने अर्को निर्वाचनको उम्मेदवारी दाखिल गर्ने अघिल्लो दिनसम्म आफ्नो पदमा बहाल रहनेछन्।’

निर्वाचन आयोगले फागुन २१ गते हुने प्रतिनिधिसभा निर्वाचनका लागि समानुपातिक प्रणालीतर्फका उम्मेदवारहरूको सूची पेश गर्ने कार्यतालिका आइतबार र सोमबारका लागि सार्वजनिक गरेको छ। समानुपातिकतर्फका ११० सिटका लागि मनोनयन प्रक्रिया सुरु भएसँगै उम्मेदवारी दर्ता भएको मानिने भएकाले सभामुख घिमिरे र उपसभामुख रानामगरको कार्यकाल स्वतः समाप्त भएको हो।

देवराज घिमिरे २०७९ माघ ५ गते प्रतिनिधिसभाको सभामुखमा निर्वाचित भएका थिए। कार्यकाल समाप्त भएसँगै दुवै नेताले सरकारी सेवा–सुविधा तथा सरकारी निवास पनि छाड्ने तयारी गरेको बताइएको छ।