पतञ्जली जग्गा मुद्दाः विशेष अदालतले अख्तियारको फाइल र साक्षी माग्यो

कुसुम शर्मा
यूके नेपाल प्रेस
बेलायत ,२९ मंसिर, २०८२ सोमवार—विशेष अदालतले पतञ्जली जग्गा प्रकरणमा मुछिएका पूर्वप्रधानमन्त्री माधवकुमार नेपालविरुद्ध अख्तियार दुरुपयोग अनुसन्धान आयोगले यसअघि गरेको मुद्दा नचलाउने निर्णयसम्बन्धी फाइल झिकाउन आदेश दिएको छ।

न्यायाधीश नारायणप्रसाद पौडेल र डिल्लीरत्न श्रेष्ठको इजलासले अख्तियारले २०६९ मंसिर २५ गते गरेको निर्णयसहित सम्पूर्ण फाइल अदालतमा पेस गर्न निर्देशन दिएको हो। उक्त आदेशसँगै अदालतले मुद्दासँग सम्बन्धित साक्षीहरूलाई प्रत्यक्ष वा श्रव्यदृश्य माध्यमबाट उपस्थित गराई बकपत्र गराउन पनि आदेश दिएको छ।

अदालतको आदेशअनुसार, वादी पक्षका साक्षीहरू विशेष सरकारी वकिल कार्यालयमार्फत अख्तियारबाट झिकाइनेछन् भने प्रतिवादी पक्षका साक्षीहरू स्वयं प्रतिवादीमार्फत उपस्थित गराइनेछन्। साक्षी उपस्थितिका लागि भौतिक उपस्थितिसँगै भिडियो कन्फरेन्सिङको विकल्प पनि खुला गरिएको छ।

विशेष अदालतको यस कदमलाई पतञ्जली जग्गा प्रकरणमा अख्तियारको अघिल्लो निर्णयको न्यायिक परीक्षणतर्फको महत्वपूर्ण चरणका रूपमा हेरिएको छ। यसले आयोगको निर्णय प्रक्रियामाथि पुनः प्रश्न उठाएको छ भने प्रकरणसँग जोडिएका तथ्य र प्रमाणहरूको पुनरावलोकनको मार्ग प्रशस्त गरेको छ।