अन्तर्राष्ट्रिय भ्रष्टाचार विरुद्ध दिवस विश्वभर मनाइँदै

कुसुम शर्मा
यूके नेपाल प्रेस
बेलायत ,२३ मंसिर, २०८२ मंगलवार—प्रत्येक वर्ष डिसेम्बर ९ मा अन्तर्राष्ट्रिय भ्रष्टाचार विरुद्ध दिवस मनाइन्छ, जसलाई संयुक्त राष्ट्रसंघले सन् २००३ मा औपचारिक मान्यता दिएको थियो। यस दिवसको उद्देश्य भ्रष्टाचारबारे जनचेतना बढाउने, सुशासनप्रति प्रतिबद्धता सुदृढ बनाउने र पारदर्शिता तथा उत्तरदायित्वलाई संस्थागत बनाउनु हो।

नेपालमा समेत आज विभिन्न कार्यक्रम, छलफल र जनसन्देशमार्फत भ्रष्टाचारविरुद्धको आवाज बुलन्द पारिएको छ। अख्तियार दुरुपयोग अनुसन्धान आयोगले संविधानअनुसार सार्वजनिक पदमा रहेका व्यक्तिबिरुद्ध भ्रष्टाचार तथा अख्तियार दुरुपयोग सम्बन्धी उजुरी दर्ता गरेर अनुसन्धान गर्नसक्ने व्यवस्थालाई आजको दिन विशेष रूपमा स्मरण गरिएको छ।

विशेषगरि युवालाई भ्रष्टाचारविरुद्ध नेतृत्वदायी भूमिकामा अघि ल्याउन यस वर्षको वैश्विक नारा— “Uniting with Youth Against Corruption: Shaping Tomorrow’s Integrity”—ले जोड दिएको छ। सन्देश के छ भने, भविष्यको पारदर्शी र इमानदार समाज निर्माण युवाको सक्रिय सहभागिताबाट मात्रै सम्भव छ।

समाजमा बढ्दो लालसा, अनैतिकता र गैरकानूनी बाटो अपनाउने प्रवृत्तिले भ्रष्टाचारलाई संसारभर गहिरो समस्या बनाइरहेको छ। यसले अर्थतन्त्र कमजोर बनाउनेदेखि राजनीतिक प्रणालीप्रति अविश्वास बढाउनेसम्मका असर पारिरहेको विज्ञहरूको निष्कर्ष छ।

विशेषज्ञहरू भन्छन्—शिक्षा र नैतिकता प्रवर्द्धन, कडा कानूनी कारबाही, रपारदर्शितामूलक शासन व्यवस्था ,भ्रष्टाचार न्यूनिकरणका आधारभूत उपाय हुन्।

समाजले व्यक्तिलाई धन, हैसियत वा सुविधा होइन, नैतिकता, इमानदारी र चरित्रका आधारमा मूल्यांकन गर्ने संस्कार बसाल्नुपर्छ, जसले दीर्घकालीन रूपमा भ्रष्टाचारविरुद्धको वातावरण तयार गर्छ।

अन्तर्राष्ट्रिय दिवसका अवसरमा नेपालसहित विश्वभरि सुशासन, पारदर्शिता र उत्तरदायित्वका लागि निरन्तर संघर्षरत अभियन्ताहरू प्रति सम्मान व्यक्त गरिएको छ।