हिंसा र युद्धबाट आएका परिवर्तन स्वीकार्य छैनन्: ओली

कुसुम शर्मा
यूके नेपाल प्रेस
बेलायत ,शनिबार, मंसिर २७, २०८२—नेकपा एमालेका अध्यक्ष केपी शर्मा ओलीले हिंसा र युद्धलाई राजनीतिक परिवर्तनको वैध माध्यमका रूपमा स्वीकार गर्न नसकिने स्पष्ट पारेका छन्। उनले शान्तिपूर्ण र लोकतान्त्रिक प्रक्रियाबाटै समाज रूपान्तरण सम्भव हुने दाबी गर्दै वर्तमान सरकारप्रति अप्रत्यक्ष आलोचना गरेका छन्।

शनिबार भक्तपुरको सल्लाघारीमा आयोजित पार्टीको एघारौं महाधिवेशनको उद्घाटन सत्रलाई सम्बोधन गर्दै ओलीले हिंसात्मक पृष्ठभूमिबाट आएका राजनीतिक परिवर्तनहरूलाई आफूहरूले नस्वीकारेको र भविष्यमा पनि नस्वीकार्ने बताए। “हामी हिंसा वा युद्धलाई परिवर्तनको साधन हुन सक्दैन भन्ने मान्यता राख्छौं,” उनले भने, “जनताको मन जितेर, शान्तिपूर्ण ढंगले समाज बदल्न सकिन्छ।”

ओलीले विविधता र बहुलतालाई नेपाली समाजको शक्ति र सम्पदाका रूपमा व्याख्या गर्दै त्यसलाई विभाजनको आधार बनाउनु अनुचित हुने धारणा राखे। “विविधतामा एकता हाम्रो मूल मन्त्र हो,” उनले भने, “तर यही कुरा गर्दा पनि हामीमाथि प्रहार हुने गरेको छ।”

उनले संविधान संशोधनलाई लोकतान्त्रिक अधिकारको अभ्यासका रूपमा चित्रण गर्दै त्यसलाई स्वतन्त्रताको वैधानिक प्रयोगको रूपमा लिएको बताए। “संविधान संशोधन गर्ने अधिकार हाम्रो हो, त्यसको सही प्रयोग हामी गर्छौं भन्ने कुरा पनि आलोचनाको विषय बनाइन्छ,” ओलीको भनाइ थियो।

महाधिवेशनको उद्घाटन सत्रमा ओलीको अभिव्यक्तिलाई आगामी राजनीतिक रणनीतिसँग जोडेर हेरिएको छ। विश्लेषकहरूका अनुसार, हिंसा र युद्धबाट आएको परिवर्तन अस्वीकार गर्ने ओलीको टिप्पणी वर्तमान सत्ता समीकरण र विगतका राजनीतिक घटनाप्रति लक्षित सन्देशका रूपमा बुझ्न सकिन्छ।