शान्तिपूर्ण र धाँधलीरहित निर्वाचनका लागि नेकपाको राष्ट्रव्यापी तयारी अभियान

कुसुम शर्मा
यूके नेपाल प्रेस
बेलायत ,२० मंसिर, २०८२ शनिवार—आसन्न प्रतिनिधिसभा निर्वाचनलाई लक्षित गर्दै नेपाली कम्युनिस्ट पार्टी (नेकापा)ले पार्टी संगठनदेखि स्थानीय तहसम्म राजनीतिक संवाद र निर्वाचन वातावरण निर्माणका लागि व्यापक निर्देशन जारी गरेको छ। पार्टीले सार्वजनिक गरेको अन्तरपार्टी निर्देशन (अपानि)मा आगामी २१ फागुनमा तय भएको निर्वाचन सफलतापूर्वक सम्पन्न गर्न आवश्यक तयारी, समन्वय र जनसंपर्क अभियानलाई सुदृढ गर्न विशेष आह्वान गरिएको छ।

अपानि अनुसार सबै तहका पार्टी संरचना तथा कार्यकर्तालाई समानान्तर रूपमा सबै राजनीतिक दलहरूसँग बैठक, वार्ता र छलफल अघि बढाइ निर्वाचनमैत्री वातावरण निर्माण गर्न भनिएको छ। त्यस्तै, सञ्चारमाध्यम, बौद्धिक समुदाय, उद्योगी–व्यवसायी, नागरिक समाजका प्रतिनिधिसँग समेत संवाद र अन्तरक्रिया गर्दै निर्वाचनको माहोल सृजना गर्न निर्देशन दिइएको छ।

पार्टीले निर्वाचन आयोग, सुरक्षा निकाय र सम्बन्धित सरकारी निकायहरूसँग आवश्यक समन्वय र सहकार्य गर्न, साथै विभिन्न सञ्चारमाध्यम र सामाजिक सञ्जालमार्फत पार्टीको चुनाव चिह्न ‘तारा’ आम नागरिकसम्म प्रभावकारी रूपमा परिचित गराउन कार्यकर्तालाई आग्रह गरेको छ।

यससँगै पूर्ववर्ती संघीय, प्रादेशिक र स्थानीय सरकारमा नेकपाले अघि सारेका जनमुखी काम, भ्रष्टाचारविरोधी पहल र सेवा–सुविधासम्बन्धी उपलब्धिहरूको व्यापक प्रचार–प्रसार गर्न पनि निर्देशन दिइएको छ। पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालद्वारा हस्ताक्षरित अपानि अनुसार भ्रष्टाचार, कुशासन, अनियमितता र बेथितिसम्बन्धी तथ्य, विवरण र घटनाहरू संकलन गरी जनतामाझ प्रस्तुत गर्न पनि पार्टीलाई जिम्मेवारी तोकिएको छ।

अपानिमा विकास निर्माण, सुशासन, रोजगारी, सामाजिक न्याय र समृद्धिका विषयमा आवाज उठाउँदै जनताका एजेण्डालाई केन्द्रीत गर्न जोड दिइएको छ। साथै, मतदाता शिक्षा, तालिम, प्रशिक्षण, गोष्ठी तथा विविध रचनात्मक र प्रचारात्मक कार्यक्रम सञ्चालन गर्न सबै तहका संगठनलाई निर्देशन गरिएको छ।

नेकपाले निर्धारित तालिका अनुसार निर्वाचन शान्तिपूर्ण, स्वतन्त्र, धाँधलीरहित तथा भयमुक्त वातावरणमा सम्पन्न हुनुपर्नेमा जोड दिएको छ। अपानिमा भनिएको छ, “वर्तमान राष्ट्रिय समस्याको समाधान, संघीय लोकतान्त्रिक गणतन्त्र र जनआन्दोलनका उपलब्धिहरूको रक्षा तथा संविधानको पूर्ण कार्यान्वयनका लागि आगामी निर्वाचन अपरिहार्य छ। संविधान संशोधनमार्फत जेन–जी पुस्ताको भावना र जनताका अग्रगामी एजेण्डा सम्बोधन गर्दै सामाजिक न्याय, सुशासन, समृद्धि र समाजवादका आधार निर्माण गर्न निर्वाचन महत्वपूर्ण अवसर हो।”