देशव्यापी एकता सन्देशसहित नेकपाको दाङ सभा: शीर्ष नेताहरू सम्बोधनमा

कुसुम शर्मा
यूके नेपाल प्रेस
बेलायत ,१३ मंसिर, २०८२ शनिवार—नवगठित नेपाली कम्युनिस्ट पार्टी (नेकपा) ले दाङको देउखुरीमा आयोजना गरेको लुम्बिनी प्रदेशस्तरिय एकता सन्देश सभा औपचारिक रूपमा सुरु भएको छ। शुक्रबार धनगढीमा कार्यक्रम गरेपछि नेकपाले दोस्रो प्रादेशिक सभा दाङमा ल्याएको हो।

सभामा संयोजक पुष्पकमल दाहाल ‘प्रचण्ड’, सह–संयोजक माधवकुमार नेपाल लगायत शीर्ष नेताहरूले सम्बोधन गर्ने कार्यक्रम छ। वामदेव गौतम, भीम रावल, वर्षमान पुनसहित अन्य वरिष्ठ नेताहरू पनि सभास्थलमा उपस्थित छन्।

गत १९ कात्तिकमा काठमाडौंको राष्ट्रिय सभागृहमा नेकपा माओवादी केन्द्र, नेकपा (एकीकृत समाजवादी) लगायत एक दर्जन वाम घटकबीच एकता घोषणा गरिएको थियो। त्यसपछि पार्टीले देशभर “एकता सन्देश” अघि बढाउने उद्देश्यसहित प्रदेश–प्रदेशमा सभा आयोजित गर्न थालेको हो।

नेकपाका अनुसार भोलि गण्डकी प्रदेशको पोखरामा, १५ मंसिरमा विराटनगर, १७ मंसिरमा काठमाडौं उपत्यका विशेष प्रदेश, १८ मंसिरमा सुर्खेत, २० मंसिरमा जनकपुर तथा २१ मंसिरमा प्रवास प्रदेशहरूको संयुक्त भर्चुअल सभा आयोजना हुनेछ।