प्रधानमन्त्री कार्कीको सचिवालयमा ‘नाताबाद’ आरोप

कुसुम शर्मा
यूके नेपाल प्रेस
बेलायत , ८ मंसिर, २०८२ सोमवार— प्रधानमन्त्री सुशीला कार्कीका प्रमुख स्वकीय सचिव आदर्श श्रेष्ठबारे उठेका प्रश्नपछि प्रधानमन्त्रीको सचिवालयले औपचारिक स्पष्टीकरण जारी गरेको छ। प्रधानमन्त्रीको सचिवालयमा आफन्तहरूको नियुक्ति गरिएको आरोप सार्वजनिक भएपछि सोमबार एक विज्ञप्ति जारी गर्दै सचिवालयले सबै नियुक्ति कानुनसम्मत प्रक्रियाअनुसार भएको दाबी गरेको हो।

विज्ञप्तिमा प्रमुख स्वकीय सचिव प्रधानमन्त्रीद्वारा नियुक्त हुने व्यवस्था रहेको र सचिवालयका अन्य कर्मचारीहरू प्रधानमन्त्रीको निर्देशनअनुसार प्रमुख स्वकीय सचिवले नियुक्त गर्न सक्ने प्रावधान स्पष्ट रूपमा उल्लेख गरिएको छ। सचिवालयले राज्यकोषमा भार नपरोस् भनेर दरबन्दीभन्दा कम जनशक्तिमा कार्यालय सञ्चालन भइरहेको पनि जनाएको छ।

प्रधानमन्त्री कार्कीको पारिवारिक पृष्ठभूमि उल्लेख गर्दै सचिवालयले चौबीसै घण्टा आवासमा बसेर सहयोग गर्न सक्ने ‘विश्वासिलो र भरपर्दो व्यक्ति’ कानुनसम्मत रूपमा नियुक्त गरिएको स्पष्ट गरेको छ। सुरक्षाका कारणहरूलाई समेत ध्यानमा राखेर गरिएको नियुक्तिलाई लिएर अनावश्यक विवाद सिर्जना नगर्न सचिवालयले आग्रह गरेको छ।

अन्य नियुक्तिहरूमा प्रमुख स्वकीय सचिवको थर वा जातीय पृष्ठभूमि मिलेकै आधारमा नातेदारीको आरोप लगाइएको भन्दै सचिवालयले यसलाई निराधार दाबी गरेको छ।

सचिवालयका अनुसार सात जना सल्लाहकार राख्न सकिने व्यवस्थामा हाल दुईजना मात्र, १९ जना विज्ञ कर्मचारीको दरबन्दीमा चारजना मात्र तथा स्वकीय सचिवालयमा ४१ जनामा १४ जना मात्र कार्यरत छन्। हाल कुल २० जना कर्मचारी सचिवालयमा कार्यरत रहेको उल्लेख गरिएको छ।