“भागेका” भनिएका पूर्वमन्त्री जलेको घरबाटै सार्वजनिक, गृहमन्त्रीको विश्वसनीयता संकटमा

कुसुम शर्मा
यू के नेपाल प्रेस
बेलायत,कात्तिक ३ —गृहमन्त्री ओमप्रकाश अर्यालले देश छाडेर भागेको दाबी गरेको एक दिनमै निवर्तमान ऊर्जामन्त्री तथा नेपाली कांग्रेसका नेता दीपक खड्का सोमबार स्वदेशमै सार्वजनिक भएका छन्।

खड्का काठमाडौंस्थित आफ्नै जलेको घरमा देखिएका हुन्। केही दिनअघि जेनजी आन्दोलनका क्रममा उक्त घरमा आगजनी भएको थियो। गृहमन्त्री अर्यालले नयाँ पत्रिकासँगको अन्तर्वार्तामा खड्का देश छाडेर भागिसकेको दाबी गरेका थिए।“ठूल्ठूला नेतामाथि छानबिन सुरु भएको छ, केही भागिसकेका छन्, तत्कालीन ऊर्जामन्त्री भागिसके,” उनले भनेका थिए। तर, खड्काले भिडियोमार्फत आफ्नो घरमै उपस्थित भई सो दाबीको खण्डन गरेका छन्।

राजनीतिक विश्लेषकहरूका अनुसार यो घटनाले सरकारको तथ्यपरकता र गृहमन्त्रीको जिम्मेवारीबारे प्रश्न उठाएको छ। कानुनविद्हरूले पनि गृह प्रशासनको दाबी प्रमाणबिना सार्वजनिक गर्नु गैरजिम्मेवार कदम भएको टिप्पणी गरेका छन्।एक कानुन विज्ञले भने, “गृहमन्त्री जस्तो कानुनी पदमा रहेका व्यक्तिबाट यस्तो आधारहीन टिप्पणी आउनु जनताप्रतिको जवाफदेहितामाथि आघात हो।”

सामाजिक सञ्जालमा पनि धेरैले प्रश्न उठाएका छन् कि, जब सत्तामा रहेका व्यक्तिहरूले प्रमाणबिना अभिव्यक्ति दिन्छन्, त्यसले नागरिकमा भ्रम फैलाउँछ र विश्वास घटाउँछ।

यो घटना अहिलेको सरकार र गृहमन्त्री अर्यालकै विश्वसनीयताको परीक्षा बनेको टिप्पणी राजनीतिक वृत्तमा गरिएको छ।