मन्त्रिपरिषद्को निर्णय : प्रहरीको ३२औं महानिरीक्षक बने चन्द्रकुवेर खापुङ

१३ भदौ, बेलायत – सरकारले नेपाल प्रहरीको नेतृत्व चन्द्रकुवेर खापुङलाई सुम्पने निर्णय गरेको छ। शुक्रबार बसेको मन्त्रिपरिषद् बैठकले खापुङलाई नेपाल प्रहरीको ३२औं महानिरीक्षक (आईजीपी) नियुक्त गरेको हो। निर्णय १९ भदौदेखि लागू हुने गरी गरिएको एक मन्त्रीले जानकारी दिएका छन्।

हालका प्रहरी महानिरीक्षक दिपक थापा १८ भदौ राति १२ बजेबाट अनिवार्य अवकाशमा जाने भएकाले नयाँ आईजीपीको टुंगो यसअघि नै लगाइएको हो। प्रधानमन्त्री केपी शर्मा ओली शनिबारदेखि चीन भ्रमणमा जाने कार्यक्रम रहेकाले त्यसअघि बसेको मन्त्रिपरिषद्ले खापुङको नियुक्ति औपचारिक रूपले तय गरेको हो।

खापुङ यसअघि प्रहरीको केन्द्रीय अनुसन्धान ब्यूरो (सीआईबी) का प्रमुखका रूपमा कार्यरत थिए। उनी र हालका आईजीपी थापा एउटै ब्याचबाट इन्स्पेक्टर भर्ना भएका थिए। त्यही ब्याचका अधिकृतहरूलाई तीन चरणमा नियुक्त गरिएको थियो।

पहिलो समूहमा नियुक्त भएकामध्ये बसन्तबहादुर कुँवर ३० वर्षे सेवाअवधि पूरा गर्दै २०८१ चैत ५ मा अवकाश गइसकेका थिए। दोस्रो समूहमा नियुक्त भएकामध्ये दिपक थापा आईजीपी बनेका थिए। उनी पनि यही १८ भदौमा सेवा अवधिका कारण अवकाश हुँदैछन्।

खापुङ भने तेस्रो समूहका एकल प्रतिस्पर्धी बनेका थिए। उनका सहकर्मी एआईजी लालमणि आचार्य यसअघि ५६ वर्षे उमेर हदका कारण अवकाश भइसकेका छन् भने अर्का एआईजी कृष्णहरि शर्मा पोखरेल पनि यही १५ भदौमा अनिवार्य अवकाशमा जाँदैछन्।

यस पृष्ठभूमिमा खापुङ प्रहरी नेतृत्वका लागि स्वाभाविक उम्मेदवार बनेका थिए। यदि सेवाअवधि सम्बन्धी नयाँ प्रहरी ऐन जारी भएमा उनको कार्यकाल थपिनेछ, नभए हालको प्रावधानअनुसार उनी पनि ३० वर्षे सेवाअवधि पूरा गर्दै आगामी २६ कात्तिक राति १२ बजेदेखि अनिवार्य अवकाशमा जानेछन्।