रास्वपा र विवेकशील साझाको एकता : घोषणा आइतबार राष्ट्रिय सभा गृहमा

कुसुम शर्मा
यूके नेपाल प्रेस
बेलायत ,१० मंसिर, २०८२ बुधवार—राष्ट्रिय स्वतन्त्र पार्टी (रास्वपा) र विवेकशील साझा पार्टीबीचको एकीकरण घोषणा आइतबार गर्ने भएको छ। दुवै दलबीच सहमति बनेपछि विवेकशील साझाले एकीकरणका लागि आधिकारिक निर्णय सार्वजनिक गरेको हो। घोषणा काठमाडौंको राष्ट्रिय सभा गृहमा आयोजना गरिने बताइएको छ।

विवेकशील साझाले उपाध्यक्ष तथा संवाद समिति संयोजक प्रकाशचन्द्र परियारले पेश गरेको ‘वैकल्पिक राजनीतिक दलबीच वृहत्तर ध्रुवीकरण/एकीकरण प्रस्ताव’ सर्वसम्मत रूपमा पारित गर्दै रास्वपासँग एक हुने निर्णय अनुमोदन गरेको हो। परियारका अनुसार वैकल्पिक राजनीतिक शक्तिको आवश्यकता बढिरहेका बेला युवा आन्दोलन—विशेषगरी ‘जेनजी विद्रोह’—ले दुई दलबीचको एकताको प्रक्रिया तीव्र तुल्याएको हो।

उनका अनुसार आगामी निर्वाचनमा प्रभावकारी भूमिका खेल्दै विकास, समृद्धि र सुशासनका जनअपेक्षालाई परिणाममुखी बनाउने उद्देश्यले एकता गरिएको हो, जसले राष्ट्रिय सन्देश दिने विश्वास गरिएको छ।

एकीकरणका प्राविधिक पक्ष भने दुवै दलका शीर्ष नेताबीच उच्च स्तरको समझदारीबाट अन्तिम रूपमा टुंग्याइने जनाइएको छ। विवेकशील साझाका प्रवक्ता आशुतोष प्रधानले वैकल्पिक राजनीतिका संस्थापक उज्ज्वल थापाको योगदान, विवेकशील आन्दोलनको दस्तावेजीकरण, र प्रतिनिधि सभा निर्वाचनलाई परिणाममुखी बनाउने साझा लक्ष्यले एकीकरणलाई सम्भव बनाएको बताए।