अन्तरिम सरकार गठन : अर्याल, खनाल र घिसिङको जिम्मेवारी निश्चित

२९ भदौ, काठमाडौं । शीतलनिवासमा आज बिहान साढे ११ बजे सुशीला कार्की नेतृत्वको अन्तरिम सरकारका मन्त्रीहरूले पद तथा गोपनीयताको सपथ ग्रहण गर्ने भएका छन्। राष्ट्रपति कार्यालयले सपथ ग्रहण कार्यक्रम तय भएको जानकारी दिएसँगै नयाँ मन्त्रिपरिषद्को प्रारम्भिक संरचना स्पष्ट हुन थालेको छ।

प्रधानमन्त्री कार्कीले हालसम्म तीन जना मन्त्रीको नाम टुंगो लगाइसकेकी छिन्। अधिवक्ता ओमप्रकाश अर्याललाई गृह तथा कानुन मन्त्रालयको जिम्मेवारी दिइएको छ भने पूर्वअर्थसचिव रामेश्वर खनाल अर्थ मन्त्रालय सम्हाल्ने भएका छन्। त्यस्तै, नेपाल विद्युत प्राधिकरणका पूर्वकार्यकारी निर्देशक कुलमान घिसिङलाई ऊर्जा मन्त्रालयको नेतृत्व दिने निर्णय गरिएको छ।

अर्याल भ्रष्टाचारविरोधी मुद्दा र सार्वजनिक सरोकारका कानुनी लडाइँका लागि परिचित नाम मानिन्छन्। अख्तियार दुरुपयोग अनुसन्धान आयोगका प्रमुख लोकमानसिंह कार्कीविरुद्ध सर्वोच्च अदालतमा दायर गरेको रिटमार्फत उनी चर्चामा आएका थिए। खनालले केही वर्षअघि सरकारलाई प्रस्तुत गरेको ४४७ पृष्ठ लामो आर्थिक सुधार प्रतिवेदनमार्फत ठोस सुझाव दिएका थिए। उता, घिसिङ नेपालमा लोडसेडिङ अन्त्य गर्ने नेतृत्वकर्ता मानिन्छन् र उनको पुनरागमनले ऊर्जा क्षेत्रमा नयाँ आशा जगाएको छ।

राष्ट्रपति रामचन्द्र पौडेलको साक्षीमा हुने सपथ ग्रहणपछि अन्तरिम सरकार आधिकारिक रूपमा काम सुरु गर्नेछ। राजनीतिक स्थिरता, आर्थिक सुधार र संविधान कार्यान्वयनका लागि कार्की नेतृत्वको मन्त्रिपरिषद्ले पहिलो कदम कसरी चाल्छ भन्ने विषयमा सर्वत्र चासो देखिएको छ।