जेनजी आन्दोलनको आगजनी : सिंहदरबार परिसरमा ४४१ सरकारी गाडी र ६०१ मोटरसाइकल जले

कुसुम शर्मा
बेलायत
नेपालको राजधानी सिंहदरबार र वरपर रहेका सरकारी कार्यालयहरूमा जेनजी आन्दोलनका क्रममा भएको आगजनीले ठुलो क्षति पुर्‍याएको छ। प्रारम्भिक विवरणअनुसार सिंहदरबार क्षेत्रमा रहेका ४४१ सरकारी गाडी र ६०१ मोटरसाइकल तथा स्कुटर पूर्ण रूपमा नष्ट भएका छन्।

गोरखापत्र दैनिकको स्थलगत अवलोकन र सम्बन्धित निकायले संकलन गरेको तथ्याङ्कअनुसार, प्रधानमन्त्री तथा मन्त्रिपरिषद्को कार्यालयदेखि शिक्षा, स्वास्थ्य, गृह, अर्थ, सडक विभाग र महान्यायाधिवक्ताको कार्यालयसम्मका सवारी साधनमा आगजनी गरिएको हो। केवल प्रधानमन्त्री तथा मन्त्रिपरिषद्को कार्यालयका मात्र ४७ गाडी/बस र ७४ मोटरसाइकल/स्कुटर खरानी भएका छन्।

त्यस्तै अर्थ मन्त्रालयमा ३६ गाडी र ५४ मोटरसाइकल, गृह मन्त्रालयमा २५ गाडी र ३० मोटरसाइकल, शिक्षा मन्त्रालयमा २६ गाडी र ४७ मोटरसाइकल जलेका विवरण आएको छ। सडक विभागको हकमा ६५ गाडी र अज्ञात संख्यामा मोटरसाइकल क्षतिग्रस्त भएको उल्लेख छ।

यसरी, सिंहदरबारभित्रका विभिन्न मन्त्रालय र निकायमा रहेका सयौं सरकारी सवारी साधन एकैपटक नष्ट हुनु मुलुकको प्रशासनिक संरचनामाथिको गम्भीर आघातका रूपमा हेरिएको छ। विश्लेषकहरूले यो क्षति केवल आर्थिक मात्र नभई, राजनीतिक असन्तोषको प्रत्यक्ष अभिव्यक्ति पनि भएको बताएका छन्।

स्रोत: नेपाली पत्र-पत्रीका तथा न्यूज एजेन्सी