जेनजीको जुलुसमा ओलीको फोटो च्यातियो : नयाँ पुस्ताको आक्रोशको राजनीतिक सन्देश

२३ भदौ, काठमाडौं ।
काठमाडौंमा आयोजित सरकारविरुद्धको प्रदर्शनमा सहभागी युवाहरू — जसलाई प्रायः जेनजी भनेर चिनिन्छ — ले प्रधानमन्त्री केपी शर्मा ओलीको फोटो च्यातेका छन्।

माइतीघर मण्डलाबाट सुरु भएको जुलुस नयाँबानेश्वरतर्फ अघि बढ्दा, बबरमहलस्थित नेपाल टेलिकम कार्यालय अगाडि पोलमा टाँसिएको ओलीको तस्वीर प्रदर्शनकारीले तल झारेर च्यातेका थिए।

प्रदर्शनमा सहभागी युवाहरूले भ्रष्टाचार, राजनीतिक बेथिती र सामाजिक सञ्जालमा सरकारद्वारा लगाइएका प्रतिबन्धको विरोध गर्दै नारा लगाएका थिए। “असन्तुष्टि चरम छ, नेताको गोजी गरम छ”, “स्वतन्त्र आवाज हाम्रो अधिकार” लगायतका प्लेकार्ड बोकेका उनीहरू राष्ट्रिय झण्डा सहित सडकमा उत्रिएका थिए। कतिपय विद्यार्थीहरू स्कुल–कलेजको पोशाकमै प्रदर्शनमा सहभागी भएका देखिन्थे।

नयाँबानेश्वरमा प्रहरी प्रशासनले सडक अवरुद्ध गर्दै जुलुसलाई रोक्ने प्रयास गरेको थियो। सुरक्षा निकायले घुसपैठ वा हिंसात्मक गतिविधि हुन सक्ने भन्दै अतिरिक्त सुरक्षाकर्मी परिचालन गरेको जनाएको छ।

प्रदर्शनकारीहरूले भने कुनै पनि राजनीतिक दल वा नेताको प्रत्यक्ष सहभागिता स्वीकार नगर्ने, सार्वजनिक सम्पत्ति नष्ट नगर्ने र शान्तिपूर्ण रूपमा आफ्नो असन्तुष्टि प्रकट गर्ने प्रतिबद्धता जनाएका छन्।

यस आन्दोलनलाई विभिन्न राजनीतिक समूह र व्यक्तिहरूले समर्थन व्यक्त गरेका छन्।