प्रधानमन्त्री ओलीको हावादारी अभिव्यक्तिले राष्ट्र संकटमा : अध्यक्ष दाहाल ।

शिव के. ढकाल
www.uknepalpress.com
National Press Corporation (NPC)

बेलायत — माओवादी अध्यक्ष पुष्पकमल दाहालले प्रधानमन्त्री केपी शर्मा ओलीको हावादारी शैलीका अभिव्यक्तिले देश संकटमा परेको बताएका छन्। बिहीबार संसद् भवन बाहिर सञ्चारकर्मीहरूसँगको संक्षिप्त कुराकानीमा दाहालले प्रधानमन्त्रीको व्यवहारलाई केवल ‘हावादारी गफ’ मात्र भएको ठहर गरेका छन्।

दाहालका अनुसार प्रधानमन्त्री ओलीले वास्तविकतालाई बेवास्ता गर्दै मात्र प्रचारमुखी अभिव्यक्ति दिनुभएको छ। “गफ दिने क्रममा जे बोले पनि हुन्छ, तर वास्तविकता के छ भन्ने कुरा सबै जनताले बुझ्नुपर्छ। उहाँ धरातल छोडेर हावादारी गफमा लाग्नुभयो, जसका कारण देश संकटमा परेको छ,” उनले भने।

उनले त्रिभुवन विश्वविद्यालयको कीर्तिपुरस्थित क्रिकेट रंगशाला निर्माणको निरीक्षण गर्दै आफूले संसद्मा बोलेको कुरासँग मेल खाने जानकारी पाएको पनि उल्लेख गरे। दाहालले भने, “म रंगशालामा निरीक्षण गर्दैछु, र मैले संसद्मा बोलेको कुरा सत्य हो। उहाँले त्यसलाई मात्रै मुद्दा बनाउनु गलत हो।”

यसअघि बुधबार मात्र प्रधानमन्त्री ओलीले संसद्मा दाहाललाई लक्षित गर्दै रंगशाला निर्माण स्थलमा जान चुनौती दिएका थिए। त्रिभुवन विश्वविद्यालय क्रिकेट रंगशालाको विषयलाई लिएर दुई नेताबीच पछिल्ला दिनहरूमा विवाद चलिरहेको छ।