महाधिवेशनको समयबारे मतभेद बीच देउवाले सुरु गरे राजनीतिक परामर्श

कुसुम शर्मा
यूके नेपाल प्रेस
बेलायत , ३० कार्त्तिक —नेपाली कांग्रेसका सभापति शेरबहादुर देउवा सिंगापुरमा उपचार गराएर फर्के लगत्तै दलभित्रको दीर्घकालीन विवाद समाधानका लागि सक्रिय बनेका छन्। शुक्रबार राति काठमाडौं आएका देउवाले शनिबार संस्थापन पक्षका चार नेताहरूसँग सामूहिक राजनीतिक परामर्श थालेका छन्।

शनिबार साँझ देउवाको चुनदेवीस्थित अस्थायी निवासमा भेट्न पुगेका नेताहरूमा प्रवक्ता डा. प्रकाशशरण महत, नेता एनपी साउद, बालकृष्ण खाँण र ज्ञानेन्द्रबहादुर कार्की थिए। जेनजी आन्दोलनका क्रममा घाइते भएर सिंगापुरमा उपचार गराएका देउवाले पार्टीभित्र उत्पन्न मतभेद र महाधिवेशनसम्बन्धी विवादबारे विस्तृत जानकारी लिएका छन्।

भेटमा सहभागी डा. महतका अनुसार देउवाले पार्टीलाई आगामी निर्वाचनका लागि एकमत बनाउनुपर्ने आवश्यकता दोहोर्याएका थिए। “पार्टीको विवाद मिलाउनुस् र चुनावमा ध्यान दिनुस् भन्ने स्पष्ट सन्देश उहाँले दिनुभयो,” महतले भने। उनका अनुसार देउवाको धारणा चुनावपछि महाधिवेशन गर्न उपयुक्त हुनेतर्फ झुकाव देखिन्छ।

कांग्रेसभित्र महाधिवेशन चुनावअघि वा पछि गर्ने विषयमा तीव्र मतभेद देखिएको छ।

• संस्थापन पक्षका शीर्ष नेताहरू चुनावपछि महाधिवेशनको पक्षमा छन्।
• दुई महामन्त्री गगन थापा र विश्वप्रकाश शर्मा भने नियमित महाधिवेशन नभए विशेष महाधिवेशन मा जानुपर्ने अडानमा छन्।
• संस्थापनइतर नेता डा. शेखर कोइराला चुनावअघि नै महाधिवेशन गर्नुपर्ने राय राखिरहेका छन्।

संस्थापन पक्षमै पनि एकमत छैन। यही मुद्दामा २४ केन्द्रीय सदस्यले चुनावअघि महाधिवेशन गर्ने मागसहित कार्यवाहक सभापति पूर्णबहादुर खड्कालाई ज्ञापनपत्र बुझाइसकेका छन्।

शनिबारको दुई घण्टा लामो छलफलपछि देउवाले पूर्वपदाधिकारी तथा संस्थापन पक्षका २४ केन्द्रीय सदस्यहरूसँग अलग–अलग भेटवार्ताको तयारी समेत गरिरहेका छन्। पार्टीभित्र चर्किएको आन्तरिक बहसका बीच देउवाको सक्रियता आगामी निर्वाचन र नेतृत्व संरचना स्पष्टिकरणतर्फ महत्वपूर्ण संकेतको रूपमा हेरिएको छ।