प्रचण्डको संदेशः अहंकार होइन, सहकार्य र जनतासँगको प्रतिवद्धता

कुसुम शर्मा
यूके नेपाल प्रेस
बेलायत , १९ कार्त्तिक —नेपाली कम्युनिष्ट पार्टी (नेकपा) का संयोजक **पुष्पकमल दाहाल ‘प्रचण्ड’**ले आफ्नो नेतृत्वमा रहेको नयाँ एकीकृत कम्युनिष्ट दललाई देशको पहिलो राजनीतिक शक्ति बनाउने दाबी गरेका छन्।

बुधबार काठमाडौंको भृकुटीमण्डपमा आयोजित पार्टी एकता घोषणासभालाई सम्बोधन गर्दै दाहालले माओवादी केन्द्र, एकीकृत समाजवादीसहित १० वटा कम्युनिष्ट घटकबीचको एकीकरण ऐतिहासिक कदम भएको बताए।

दाहालले भने, “हाम्रो यो एकतालाई कसैले रोक्न सक्दैन। हामी देशव्यापी अभियानमा जानेछौं, जनताले हाम्रा कुरा सुन्नेछन्।” उनले देशका हरेक जिल्लामा एकतासभा र जनसंवाद कार्यक्रम सञ्चालन गर्ने योजना रहेको जानकारी दिए।

ऐतिहासिक एकता र नयाँ सुरुवात

माओवादी केन्द्र र एकीकृत समाजवादीसहित १० कम्युनिष्ट दलबीच बुधबार एकता घोषणा भएको हो। पार्टीको संयोजकमा दाहाल र सह–संयोजकमा माधवकुमार नेपाल चयन भएका छन्।
दाहालले यो एकतालाई “नेपालको कम्युनिष्ट आन्दोलनको इतिहासमा अभूतपूर्व” भन्दै अब देशका चुनौती र समस्याको समाधानका लागि नयाँ बाटो खुलेको बताए।

उनले भने, “एकै दिन १० वटा पार्टी एक हुनु असाधारण हो। आजको दिनलाई नेपालको राजनीतिक इतिहासले सदैव सम्झिनेछ।”

अहंकार होइन, सहकार्यको सन्देश

दाहालले विपक्षी दलहरूलाई लक्षित गर्दै “हामी अहंकारमा छैनौं, सहकार्यमा छौं” भन्दै अन्य वामपन्थी दल र गैर–कम्युनिष्ट शक्तिसँग पनि सहकार्यको ढोका खुला रहेको स्पष्ट पारे।
उनले एमाले अध्यक्ष केपी शर्मा ओलीलाई सन्देश दिँदै भने, “म अहंकारमा हिँड्दिन। अरूलाई पनि एकताबद्ध गरेर लैजानुपर्छ। दश घटकबीच एकता भयो भनेर हामी चुप लागेर बस्दैनौं।”

नयाँ पुस्ता र जिम्मेवारीको प्रतिबद्धता

दाहालले नयाँ पुस्तालाई पार्टी र राज्य प्रणालीमा स्थान दिनुपर्ने आवश्यकता औंल्याए।
उनले व्यक्तिगत स्वार्थभन्दा माथि उठेर सामूहिक नेतृत्वमा अघि बढ्ने प्रतिबद्धता जनाउँदै भने, “अब व्यक्तिगत कुरा गर्ने समय छैन। सबैको सल्लाह र सुझाव लिएर अघि बढ्छौं।”

दाहालले यो एकतालाई सुरुवातको रूपमा लिँदै नेकपा एमालेलगायत अन्य वामपन्थी दललाई समेत एकतामा ल्याउने लक्ष्य रहेको बताए।
“माधवजीले भनेजस्तै, अरू दललाई पनि एकतामा ल्याउँछौं। एमालेलाई पनि हातेमालो गर्न तयार छौं,” उनले भने।

दाहालले निष्कर्षमा भने, “देश बनाउने जिम्मेवारी केवल कम्युनिष्टकै होइन। अरू दलहरूसँग पनि सन्तुलित सहकार्य गरेर अघि बढ्नुपर्छ।”