निर्वाचन आयोगले मतदाता नामावली दर्ता प्रक्रिया पुनः सुरु गर्‍यो

काठमाडौं — निर्वाचन आयोगले मतदाता नामावली दर्ता प्रक्रिया पुनः सुरु गरेको छ, जसअन्तर्गत कात्तिक ३० गतेसम्म दर्ता गर्न सकिनेछ।

आयोगले बिहीबार जारी गरेको विज्ञप्तिमा १६ वर्ष उमेर पुगेका सबै नेपाली नागरिकले नागरिकताको प्रमाणपत्रका आधारमा नामावलीमा दर्ता हुन सक्ने स्पष्ट गरेको छ। तर मतदानमा सहभागी हुन भने १८ वर्ष पूरा हुनुपर्ने कानुनी प्रावधान यथावत रहनेछ।

मतदाता नामावली दर्ता सातै प्रदेशका निर्वाचन कार्यालयमार्फत बिहान ८ बजेदेखि साँझ ६ बजेसम्म, सार्वजनिक बिदा बाहेक, निरन्तर जारी रहने आयोगले जनाएको छ।

यसअघि सुशीला कार्की नेतृत्वको अन्तरिम सरकारले फागुन २१ गतेका लागि निर्वाचन मिति तोकेपछि नामावली दर्ता प्रक्रिया रोकिएको थियो। यद्यपि सरकारले अध्यादेशमार्फत निर्वाचन मिति घोषणा गर्दा पनि नामावली दर्ता प्रक्रिया खुला गर्ने व्यवस्था गरिएको थियो।

आयोगका अनुसार दर्ता प्रक्रिया पुनः सञ्चालनमा आएसँगै नयाँ मतदाता थपिने र आगामी निर्वाचनमा सहभागिताको आधार तयार हुने अपेक्षा गरिएको छ।