ओलीको प्रश्न: सरकार मौन, असुरक्षाबीच सुविधा मात्र फिर्ता?

काठमाडौं, ११ असोज – नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले सरकारले सुविधा नदिए पनि सुरक्षा भने सुनिश्चित गर्नुपर्ने बताएका छन्।

भक्तपुरमा आयोजित चियापान समारोहलाई सम्बोधन गर्दै उनले सामाजिक सञ्जालमार्फत आफ्नो घर घेराउने अभियान सार्वजनिक भए पनि सरकारले कुनै प्रतिक्रिया नदिएको आरोप लगाए।

“मेरो घर लोकेट गरेर ‘घर घेर्न जाऔं’ भनेर सामाजिक सञ्जालमा अभियान चलाइँदैछ। तर सरकार के गर्दैछ? हेरेर मात्रै बस्ने?” उनले प्रश्न गरे।

ओलीले पूर्वप्रधानमन्त्रीका रुपमा पाउने गाडी, पासपोर्ट र अन्य सुविधा सरकारले फिर्ता लिन सक्ने बताए। तर उनका अनुसार, “सुविधा आवश्यक छैन होला, तर सुरक्षाको जिम्मेवारी भने सरकारले लिनैपर्छ।”

उनले आरोप लगाए कि सरकारले राजनीतिक असुरक्षालाई हतियार बनाउँदै सत्ता सञ्चालन गरिरहेको छ।
“आतंक फैलाएर सत्तामा पुग्ने, अनि अरुलाई सुरक्षा नदिने कुरा अस्वीकार्य हुन्छ,” उनले भने।

राजनीतिक परिस्थिति र मौसमबीच तुलना गर्दै ओलीले भने, “मौसम पनि सधैं एकनास हुँदैन। बादल र झरी आउँछ, तर फेरि मुस्कान फर्किन्छ।”