निर्वाचन आयोगको सिफारिस स्वीकृत भए सात दिन लगातार बिदा

कुसुम शर्मा
यूके नेपाल प्रेस
बेलायत ,१० फागुन, २०८२ आइतवार— फागुन २१ गते हुने निर्वाचनलाई लक्षित गर्दै निर्वाचन आयोग ले तीन दिन सार्वजनिक बिदा दिन सरकारलाई सिफारिस गरेको छ।

आयोगका कार्यवाहक प्रमुख निर्वाचन आयुक्त रामप्रसाद भण्डारीका अनुसार, सबै मतदाताको सहज सहभागिता सुनिश्चित गर्न फागुन २१, २२ र २३ गते सार्वजनिक बिदा दिन प्रस्ताव गरिएको हो।

“निर्वाचनका दिन नागरिकले निर्धक्क भएर मतदान गर्न सकून् भन्ने उद्देश्यले हामीले तीन दिन सार्वजनिक बिदाको सिफारिस गरेका हौँ,” उनले भने, “यसलाई स्वीकृत गर्ने वा नगर्ने निर्णय सरकारको अधिकार क्षेत्रभित्र पर्छ।”

यदि आयोगको सिफारिसअनुसार सरकारले बिदा स्वीकृत गरेमा, यस वर्ष फागुनमा लगातार सात दिन सार्वजनिक बिदा पर्ने सम्भावना छ। फागुन १८ र १९ गते होली पर्व, फागुन २० र २१ गते निर्वाचनसम्बन्धी गतिविधि, त्यसपछि २३ र २४ गते शनिबार र आइतबार पर्नुका साथै अन्तर्राष्ट्रिय नारी दिवस पनि यही अवधिमा परेकाले लामो बिदा हुने देखिएको हो।

लामो सार्वजनिक बिदाले मतदाता सहभागिता बढाउन सहयोग पुग्ने अपेक्षा गरिएको छ। तर यसले सरकारी कार्यालय, बैंक तथा शैक्षिक संस्थाको नियमित सेवा प्रवाहमा प्रभाव पार्न सक्ने विषयमा समेत चासो व्यक्त गरिएको छ।

सरकारले आयोगको सिफारिसबारे औपचारिक निर्णय भने अझै सार्वजनिक गरेको छैन।