तराई–मधेसमा घटनाप्रति गृह मन्त्रालयको गम्भीर चासो

कुसुम शर्मा
यूके नेपाल प्रेस
बेलायत ,९ फागुन, २०८२ शनिवार — गृह मन्त्रालयले धार्मिक सहिष्णुता र सामाजिक सम्मान कायम राख्न देशभरका समुदायलाई अपिल गरेको छ। तराई–मधेसका केही जिल्लामा पछिल्लो समय देखिएका घटनाप्रति मन्त्रालयले गम्भीर चासो व्यक्त गरेको छ।

मन्त्रालयकी सहप्रवक्ता रमा आचार्य (सुवेदी)द्वारा जारी विज्ञप्तिमा सबै पक्षलाई संयमता अपनाउन, कुनै अवाञ्छित गतिविधि नगर्न, र सबै धर्म तथा समुदायबीच पारस्परिक सम्मान कायम राख्न अनुरोध गरिएको छ।

शनिबार गृह मन्त्रालयमा बसेको केन्द्रीय सुरक्षा समितिको बैठकले देशको विद्यमान सुरक्षा अवस्थाबारे समीक्षा गरेको थियो। बैठकले रौतहट, दाङ लगायतका क्षेत्रमा सार्वजनिक र व्यक्तिगत सम्पत्तिमा आगजनी, तोडफोड, राजनीतिक झण्डा जलाउने जस्ता कानूनविपरीत गतिविधि भइरहेकाे जानकारी दिएको छ। मन्त्रालयले यस्ता गतिविधिले सामाजिक सद्भाव र आपसी विश्वासमा असर पुर्याएको ठहर गरेको छ।

बैठकले नेपाल प्रहरीका एआइजी उमाप्रसाद चतुर्वेदीलाई मधेस क्षेत्रमा हालसालै भएका र हुनसक्ने सम्भावित गतिविधिको विश्लेषण गरी प्रतिवेदन पेश गर्न खटाउने निर्णय गरेको छ। यससँगै सुरक्षा संवेदनशील क्षेत्रमा उच्च पदाधिकारी खटाएर निगरानी बढाउन निर्देशन पनि दिइएको छ।

स्थानीय प्रशासनले रौतहटमा दुई समुदायबीच झडप भइरहेकाले अनिश्चितकालीन कर्फ्यू आदेश जारी गरेको छ। गृह मन्त्रालयले घटनाको सूक्ष्म निगरानी गरिरहेको र संलग्नलाई कानूनी दायरामा ल्याएर कारबाही अघि बढाउने जनाएको छ।