नेपाल–जापान कूटनीतिक सम्बन्धको ७०औँ वर्षगाँठमा राष्ट्रपति पौडेल जापान जाँदै

कुसुम शर्मा
यूके नेपाल प्रेस
बेलायत ,१५ माघ, २०८२ बिहीवार—राष्ट्रपति रामचन्द्र पौडेल आगामी माघ १८ गते आइतबार जापानको औपचारिक भ्रमणमा जाने भएका छन्। बिहीबार बसेको मन्त्रिपरिषद् बैठकले राष्ट्रपति पौडेल नेतृत्वको प्रतिनिधिमण्डलको जापान भ्रमण स्वीकृत गरेको हो।

सरकारका प्रवक्ता तथा गृहमन्त्री ओमप्रकाश अर्यालका अनुसार राष्ट्रपति पौडेलसहितको प्रतिनिधिमण्डल माघ १८ गते जापान प्रस्थान गर्नेछ। उक्त भ्रमण नेपाल र जापानबीच कूटनीतिक सम्बन्ध स्थापना भएको ७०औँ वर्षगाँठको अवसरमा आयोजना हुने औपचारिक कार्यक्रमसँग सम्बन्धित रहेको छ।

मन्त्रिपरिषद्‌को निर्णयअनुसार राष्ट्रपति पौडेल नेतृत्वको प्रतिनिधिमण्डलले माघ १८ देखि २१ गतेसम्म जापानमा आयोजना हुने विविध कार्यक्रममा सहभागिता जनाउनेछ। ती कार्यक्रमहरू दुई देशबीचको दीर्घकालीन कूटनीतिक सम्बन्ध, आपसी सहकार्य र मैत्रीलाई थप सुदृढ बनाउने उद्देश्यले आयोजना गरिएका हुन्।

नेपाल र जापानबीच सन् १९५६ मा कूटनीतिक सम्बन्ध स्थापना भएको थियो। जापान नेपालका प्रमुख विकास साझेदार राष्ट्रहरूमध्ये एक हो, र दुई देशबीच पूर्वाधार, शिक्षा, स्वास्थ्य तथा मानव संसाधन विकासका क्षेत्रमा दीर्घकालीन सहकार्य रहँदै आएको छ।