संस्थापनको विरोधबीच कांग्रेसमा विशेष महाधिवेशन आह्वान

कुसुम शर्मा
यूके नेपाल प्रेस
बेलायत ,२३ पौष, २०८२ मंगलवार—नेपाली कांग्रेसका महामन्त्रीद्वय गगन थापा र विश्वप्रकाश शर्माले पार्टी विधानको व्यवस्था अनुसार विशेष महाधिवेशन आह्वान गरेका छन्। बुधबार साँझ संयुक्त विज्ञप्ति जारी गर्दै उनीहरूले पुस २७ र २८ गते काठमाडौँको भृकुटीमण्डपमा विशेष महाधिवेशन आयोजना हुने जनाएका हुन्।

महामन्त्रीद्वयका अनुसार बदलिँदो राजनीतिक परिस्थितिमा पार्टीलाई सुदृढ बनाउन, जनभावनाअनुरूप नीति निर्माण गर्न र नयाँ ऊर्जासहित नेतृत्वमार्फत संगठनात्मक पुनर्निर्माणका लागि विशेष महाधिवेशन आवश्यक भएको छ। उनीहरूले महाधिवेशन प्रतिनिधिहरूलाई सहभागिताका लागि आग्रह गरेका छन्।

यसअघि, ५४ प्रतिशतभन्दा बढी महाधिवेशन प्रतिनिधिहरूले असोज २९ गते कार्यवाहक सभापति पूर्णबहादुर खड्कालाई हस्ताक्षर बुझाउँदै विशेष महाधिवेशनको माग गरेका थिए। तर केन्द्रीय तहबाट प्रक्रिया अघि नबढेको भन्दै महामन्त्रीद्वयले विधानको धारा १७(२) अनुसार विशेष महाधिवेशन आह्वान गर्न बाध्य भएको बताएका छन्। उक्त धाराअनुसार, केन्द्रीय महाधिवेशनका ४० प्रतिशत प्रतिनिधिहरूले माग गरेमा तीन महिनाभित्र विशेष महाधिवेशन बोलाउनुपर्ने व्यवस्था छ।

विशेष महाधिवेशन आह्वान पार्टी सभापति शेरबहादुर देउवा र कार्यवाहक सभापति खड्कासहित संस्थापन पक्षको विरोधका बीच गरिएको हो। पुस १८ गते बसेको केन्द्रीय कार्यसम्पादन समितिको बैठकले नियमित महाधिवेशनको कार्यतालिका आइसकेकाले विशेष महाधिवेशन आवश्यक नरहेको निष्कर्ष निकालेको थियो।

यसैबीच, कांग्रेसका मुख्यसचिव कृष्णप्रसाद पौडेलले विज्ञप्ति जारी गर्दै केन्द्रीय समितिको निर्णयबिना कुनै व्यक्तिले विशेष महाधिवेशन बोलाउन नसक्ने बताएका छन्। तर महामन्त्रीद्वयले पार्टी विधानअनुसार केन्द्रीय कार्यालय आफ्नो मातहत रहेको र बहुमत प्रतिनिधिहरूको मागलाई बेवास्ता गर्न नसकिने तर्क गरेका छन्।

महामन्त्रीद्वय थापा र शर्माले विशेष महाधिवेशनले पार्टीलाई विभाजनतर्फ नलैजाने स्पष्ट पार्दै, विधानको पालना र आन्तरिक लोकतन्त्र सुदृढ गर्ने प्रक्रियाका रूपमा यसलाई व्याख्या गरेका छन्।