राष्ट्रिय सभाका लागि पाँच दलबीच सिट बाँडफाँट, बुधबार मनोनयन दर्ता

कुसुम शर्मा
यूके नेपाल प्रेस
बेलायत ,२२ पौष, २०८२ मंगलवार—राष्ट्रिय सभाको आगामी निर्वाचनका लागि पाँच राजनीतिक दलबीच सिट भागबन्डाको सहमति भएको छ। नेपाली कांग्रेस, नेकपा एमाले, नेकपा , लोकतान्त्रिक समाजवादी पार्टी (लोसपा) र जनता समाजवादी पार्टी नेपाल (जसपा नेपाल) बीच सिट बाँडफाँट गर्ने समझदारी बनेको हो।

सहमति अनुसार कांग्रेस र एमालेले समान रूपमा सात–सात सिट लिने भएका छन् भने नेकपाले तीन सिट पाउनेछ। पार्टी एकीकरणको घोषणा गरिसकेका लोसपा र जसपा नेपालका लागि संयुक्त रूपमा एक सिट छुट्टाइएको छ।

तर कुन प्रदेशमा कुन दलले कुन समूह (क्लष्टर) को सिट लिने भन्ने विषयमा अझै अन्तिम टुंगो नलागेको कांग्रेसका एक नेताले बताएका छन्। कांग्रेस नेता एनपी सावदका अनुसार कांग्रेसले प्रत्येक प्रदेशबाट कम्तीमा एक–एक सिट लिने विषयमा प्रारम्भिक समझदारी भएको छ।

उम्मेदवार छनोटका लागि कांग्रेसले बुधबार बिहान केन्द्रीय कार्यसम्पादन समितिको बैठक बोलाएको छ। यसैबीच, राष्ट्रिय सभामा फागुन २० गतेदेखि १९ जना सांसदको कार्यकाल सकिँदैछ। तीमध्ये १८ सिटका लागि बुधबार मनोनयन दर्ता हुँदैछ भने निर्वाचन माघ ११ गते हुने कार्यक्रम छ।

सरकारको सिफारिसमा राष्ट्रपतिबाट मनोनयन भएका वामदेव गौतमको कार्यकाल पनि यही अवधिमा समाप्त हुँदैछ। उनको स्थानमा सरकारले नयाँ सिफारिस गर्नेछ।