प्रचण्ड: “निर्वाचन आयोगमा पेस गरिएको सूचीबारे भ्रममा नपर्नुहोस्”

कुसुम शर्मा
यूके नेपाल प्रेस
बेलायत , २८ कार्त्तिक —नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले निर्वाचन आयोगमा बुझाइएका पार्टी दर्तासम्बन्धी विवरणलाई लिएर केही ठाउँमा देखिएको भ्रमबारे स्पष्ट गर्दै त्यसमा नअड्किन आग्रह गरेका छन्। संयोजक दाहालको सचिवालयले सोमबार विज्ञप्ति जारी गर्दै सूची व्यवस्थापकीय कारणले निर्माण गरिएको भए पनि यसलाई स्थायी संरचना ठान्न नहुने जनाएको छ।

मुख्य बुँदाहरू

• पार्टी दर्ताका लागि निर्वाचन आयोगमा पेस गरिएको सूचीबारे कुनै भ्रममा नपर्न संयोजक प्रचण्डको आग्रह
• सूचीमा देखिएको महिला प्रतिशत कानुनी आवश्यकताअनुसार मात्रै राखिएको स्पष्टीकरण
• एकीकृत केन्द्रीय संरचना र पदाधिकारीहरू सहमतिका आधारमा गठन हुँदै
• नयाँ एकीकृत वाम दल गठन प्रक्रिया निर्वाचन आयोगको समयसीमासँगै अन्तिम चरणमा

विज्ञप्तिमा भनिएको छ कि आयोगमा पेस गरिएको सूची एकीकरणपूर्वका स्थायी समिति सदस्यहरूकै आधारमा तयार गरिएको हो। कानुनअनुसार महिला सदस्यको एक-तिहाइ अनिवार्य भएपछि तत्काल उपस्थित भई हस्ताक्षर गर्न सक्ने १३ महिला केन्द्रीय सदस्यका नाम थपिएको स्पष्टिकरण सचिवालयले दिएको छ। सचिवालयका अनुसार, “यो कुनै पृथक संरचना होइन, विधानअनुसारको संरचना सहमतिका आधारमा पछि नै टुंगो लाग्नेछ।”

दाहालले पार्टी संयोजक र सह–संयोजकबाहेकका सबै पद तथा समितिहरू आपसी सहमतिका आधारमा गठन हुने बताउँदै एकीकृत पार्टीको केन्द्रीय समिति र अन्य संरचना त्यही प्रक्रियाअनुसार पूरा हुने जानकारी दिएका छन्।

नेकपा (माओवादी केन्द्र), नेकपा (एकीकृत समाजवादी) सहित एक दर्जनभन्दा बढी वाम समूह मिलेर एकीकृत नेपाली कम्युनिस्ट पार्टी निर्माणको प्रक्रिया अघि बढिरहेको छ। यसबीच, सरकारले फागुन २१ गते आम निर्वाचन घोषणा गरेको कारण निर्वाचन आयोगले यही मंसिर ३० भित्र दल दर्ता पूरा गरी प्रमाणपत्र लिनुपर्ने समयसीमा तोकेको छ।

नयाँ दल निर्माण र दर्ता प्रक्रिया तीव्र गतिमा अघि बढिरहेका बेला नेतृत्वले भ्रम फैलन नदिन आग्रह गरेको छ।