चीनले नेपाललाई आगामी आम निर्वाचनमा सहयोग गर्ने प्रतिबद्धता व्यक्त

कुसुम शर्मा
यूके नेपाल प्रेस
बेलायत , २९ कार्त्तिक —नेपालका लागि चीनका राजदूत छन सङले आगामी आम निर्वाचन सफलतापूर्वक सम्पन्न गर्ने जिम्मेवारीमा नेपाल सरकारलाई “पूर्ण सहयोग” प्रदान गर्ने चीनको प्रतिबद्धता व्यक्त गरेका छन्। उनले चीन हाल अन्तरिम सरकारसँग निकट समन्वयमा रहेर काम गरिरहेको भन्दै निर्वाचनलाई नै प्राथमिकता दिएको स्पष्ट पारे।

शुक्रबार सञ्चारमाध्यमका प्रमुख तथा सम्पादकहरूसँगको भेटमा राजदूत छनले बेल्ट एन्ड रोड (BRI) परियोजनामा उल्लेख्य प्रगति भएको दाबी गर्दै ती सबै प्रशासनिक प्रक्रियामा रहेका कारण केही कार्यक्रममा ढिलाइ स्वाभाविक रहेको बताएका छन्।

उनका अनुसार, “स्थायी सरकार अपरिहार्य छ—चुनावपछि बन्ने सरकारले BRI तथा अन्य सहयोग परियोजनालाई द्रुतगतिमा अघि बढाउन सक्छ।”

राजदूत छनले चीनको पन्ध्रौँ पञ्चवर्षीय योजना नेपालसहित छिमेकीका आर्थिक आवश्यकतालाई ध्यानमा राखेर तयार गरिएको बताउँदै कृषि उत्पादन चीनको बजारमा निर्यात गर्ने योजना अन्तिम चरणमा पुगेको जानकारी दिए। उनले नेपालका विकास परियोजनालाई चीनले रणनीतिक लगानी साझेदारका रूपमा समेटिरहेको समेत बताए।

नेपालले एक–चीन नीतिप्रति देखाउँदै आएको स्थिर समर्थनप्रति आभार व्यक्त गर्दै उनले नेपाल–चीन सम्बन्ध “सधैं सुमधुर र विश्वासपूर्ण” रहेको दाबी गरे। दुवै देशले संयुक्त राष्ट्रसंघ केन्द्रित बहुपक्षीय प्रणालीलाई समर्थन गर्दै आएको उनको भनाइ छ।