कुलमान घिसिङको नयाँ राजनीतिक यात्रा : सहकार्य र असहमतिको बीचमा उज्यालो नेपाल

कुसुम शर्मा
यूके नेपाल प्रेस
बेलायत , २५ कार्त्तिक —ऊर्जा मन्त्री कुलमान घिसिङको नेतृत्वमा तयार गरिएको नयाँ राजनीतिक दल ‘उज्यालो नेपाल’ ले निर्वाचन आयोगमा पदाधिकारीको अद्यावधिक विवरण पेस गरेको छ। पार्टी दर्ताको प्रक्रिया गत साउनमै सुरु भए पनि मंगलबार मात्र आयोगमा औपचारिक रूपमा पदाधिकारी सूची बुझाइएको हो।

आयोगका प्रवक्ता नारायणप्रसाद भट्टराईका अनुसार उज्यालो नेपाल पार्टीले ५१ सदस्यीय केन्द्रीय समिति गठन गरेको विवरण आयोगमा दर्ता गरेको छ। विवरणअनुसार पूर्वसचिव अनुप उपाध्यायलाई पार्टीको अध्यक्ष तोकिएको छ, र पार्टीको चुनाव चिन्ह ‘चिम’ रहनेछ।

तर राजनीतिक वृत्तमा यो दललाई स्पष्ट रूपमा कुलमान घिसिङकै राजनीतिक पहलको रूपमा हेरिएको छ, यद्यपि उनी आधिकारिक रूपमा सूचीमा परेका छैनन्।

कुलमानको अदृश्य नेतृत्व र विवाद

पार्टीका एक अगुवा नेता जितराम लामाका अनुसार “उज्यालो नेपाल” कुलमानकै अगुवाइमा खुलेको दल हो।उनले भने, “कुलमानजी अहिले सरकारको जिम्मेवारीमा हुनुहुन्छ, त्यसैले पार्टीको अगुवाइ बाहिरबाट गर्नुभएको हो। पछि उहाँले केन्द्रीय नेतृत्व सम्हाल्नुहुनेछ।”

तर, पार्टी गठन प्रक्रियामा सहभागी ‘जेनजी समूह’ र ‘सुदन गुरुङ टिम’ भने अन्तिम समयमा दलमा नजोडिने निर्णयमा पुगेका छन्। उनीहरूले कुलमानले छलफलमा लचिलोपन नदेखाएको र सबै वैकल्पिक शक्तिलाई समेट्ने सहमति नबनेको बताएका छन्।

पहिचानवादी र इन्जिनियरहरूको गठजोड

पार्टीमा पूर्वकिरात धर्मगुरु फाल्गुनन्दका अनुयायी नेता डकेन्द्रसिंह थेगिम, प्राध्यापक महेन्द्र लावती लगायतका पहिचानवादी नेताहरू सामेल छन्। लावतीले भने, “उज्यालो नेपाल सबै वैकल्पिक शक्तिको साझा मञ्च बन्नेछ, जसले नेपालको विकासको नयाँ नक्सा तयार पार्नेछ।”इन्जिनियरहरूको उल्लेख्य सहभागिता र युवा प्राविधिकहरूको प्रतिनिधित्व पनि यस दलमा रहेको बताइएको छ।

सहकार्य खुला, एकता टुंगोमा छैन

जेनजी अभियन्ता अनिल बानियाँका अनुसार सोमबारसम्म सहकार्यको सम्भावना देखिए पनि अन्ततः वार्ता निष्कर्षविहीन बनेको हो।
“हामी वैकल्पिक राजनीतिका साझा मुद्दामा सहमत थियौं, तर नेतृत्व बाँडफाँटमा असहमति भयो,” उनले भने।त्यसैगरी, केही नेताहरूले आफ्नो नाम सूचीमा परे पनि जानकारी नपाएको भन्दै आपत्ति जनाएका छन्।

राजनीतिक सन्देश

राजनीतिक विश्लेषकहरूका अनुसार कुलमान घिसिङले ‘उज्यालो नेपाल’मार्फत प्राविधिक दक्षता, पारदर्शिता र विकासमुखी सोचलाई राजनीतिमा रूपान्तरण गर्ने प्रयास गरेका छन्। तर, सहकार्यमा देखिएको असहमति र नेतृत्वको अस्पष्टताले पार्टीको प्रारम्भिक यात्रालाई चुनौतीपूर्ण बनाएको छ।

यसबीच, उज्यालो नेपालले भने भविष्यमा पनि संवाद र सहकार्यको ढोका खुला रहेको बताउँदै, पार्टीलाई *“साझा लक्ष्यतर्फ अघि बढाउने राष्ट्रिय अभियान”*का रूपमा व्याख्या गरेको छ।