ओलीको संकेत — एमाले महाधिवेशन छलफलबिनै सकिने

कुसुम शर्मा
यूके नेपाल प्रेस
बेलायत , २३ कार्त्तिक — नेकपा एमालेका अध्यक्ष केपी शर्मा ओलीले यसपालिको पार्टी महाधिवेशन आफ्नो निर्देशनात्मक मन्तव्यपछि नै समाप्त हुने बताएका छन्।

शुक्रबार काठमाडौंमा आयोजित एमाले केन्द्रीय शिक्षा तथा मानव स्रोत विभागको विद्वत वर्ग अन्तरसंवाद कार्यक्रममा बोल्दै ओलीले भने,“यसपालि मैले एकतर्फी रूपमा महाधिवेशनलाई सम्बोधन गर्ने हो। मेरो उद्घाटन मन्तव्य आउँछ, त्यत्ति हो। त्यसमा पनि छलफल हुँदैन।”ओलीका अनुसार महाधिवेशन लामो समयसम्म नलग्नेछ, किनभने अहिलेको राजनीतिक अवस्थाले त्यसको आवश्यकता नराखेको बताए।

“भ्यायौं भने महाधिवेशन पाँच–सात दिन जान्छ, त्यो हामी धान्न सक्दैनौं,” उनले थपे।पूर्वप्रधानमन्त्री ओलीले अहिलेको मुख्य प्राथमिकता विघटित प्रतिनिधिसभा पुनर्स्थापना गर्नुपर्नेमा जोड दिए।“अहिले विघटित प्रतिनिधिसभा पुनर्स्थापना गर्नुपर्नेछ। त्यसपछि नीति निर्माण र कार्यान्वयन सुविस्तासँग गर्न सकिन्छ,” उनले भने।

ओलीका अनुसार हालको महाधिवेशन नेतृत्व चयन वा आन्तरिक पुनर्गठनका लागि नभई पार्टीलाई स्पष्ट दिशानिर्देश दिनका लागि केन्द्रित हुनेछ। उनले भने,“अहिलेको चुरो कुरा यही हो — राष्ट्रिय राजनीतिको उपलब्धि यहीँ छ, प्रयास गर्ने विन्दु यही हो।”उनले केही नेताहरूको अनुशासनहीन व्यवहारका कारण महाधिवेशन एक वर्षअघि ल्याउनुपरेको खुलासा पनि गरे।

“केही साथीहरूले नेतृत्व चयनको कुरा उठाए, पार्टीमा पुनर्गठन चाहियो भनेर धेरै कराए, त्यसैले एक वर्षअघि महाधिवेशन गर्नुपरेको हो,” ओलीले स्पष्ट पारे।ओलीले कार्यकर्ताहरूले नै काम गर्ने र नगर्ने नेताको मूल्यांकन गर्ने बताए।

“काम नगर्ने गए हुन्छ, काम गर्ने बसे हुन्छ। को अड्या छ, को लड्या छ, कसले काम गरेको छ, कार्यकर्ताले नै देखेका छन्,” उनले भने।