प्रचण्ड : परिवर्तन पक्षधर शक्तिहरूबीच आपसी सम्मान र सहकार्य आवश्यक

शिव कुमार ढकाल
यूके नेपाल प्रेस
बेलायत । नेकपा (माओवादी केन्द्र) महाधिवेशन आयोजक समितिका संयोजक पुष्पकमल दाहाल ‘प्रचण्ड’ ले परिवर्तनका पक्षधर शक्तिहरूबीच आपसी सम्मान, सामाजिक सद्भाव र सहकार्यको भावना सुदृढ गर्नुपर्ने बताएका छन्।

छठ पर्वको अवसरमा शुभकामना सन्देश जारी गर्दै प्रचण्डले समृद्ध, न्यायपूर्ण र समाजवादी नेपाल निर्माणका लागि सबै पक्ष एकजुट भएर अघि बढ्नुपर्ने आवश्यकता औंल्याए।

उनले भने, “परिवर्तन पक्षधर शक्तिहरूबीच आपसी सम्मान, सामाजिक सद्भाव र सहकार्यको भावना सुदृढ गर्दै हामी सबै मिलेर समृद्ध, न्यायपूर्ण र समाजवादी नेपालको निर्माणतर्फ अघि बढ्न सकौं भन्ने विश्वास व्यक्त गर्दछु।”

छठ पर्वले प्रकृति र मानवबीचको सम्बन्धलाई सशक्त बनाउँदै आत्मबल, धैर्य र आशावादको सन्देश दिने उनले उल्लेख गरे।

प्रचण्डका अनुसार, “छठ पर्वले प्रकृति र मानवभित्र विद्यमान अँध्यारोलाई चिर्दै सबैमा मनको उज्यालो, पवित्रता र सकारात्मक ऊर्जा जगाओस्। देशमा शान्ति, समृद्धि र स्थायित्वको नयाँ प्रभात उदाओस्।”

उनले मधेस–तराईको मुख्य पर्वका रूपमा मनाइने छठले संस्कृति, परम्परा र श्रम–सम्बन्धलाई सुदृढ बनाउँदै सहअस्तित्व, सन्तुलन र आत्मशुद्धिको चेतना जगाउने विश्वास व्यक्त गरे।