गृह मन्त्रालयको आग्रह : शान्तिपूर्ण निर्वाचन वातावरण कायम राख्न सबै संयमित बनौं

शिव कुमार ढकाल
यूके नेपाल प्रेस । बेलायत ।

८ कात्तिक, बेलायत — सरकारले आगामी निर्वाचनका लागि अनुकूल वातावरण बनाउन सक्रिय रहेको बताउँदै गृह मन्त्रालयले सबै पक्षलाई संयमित रहन आग्रह गरेको छ।

मन्त्रालयले जारी गरेको विज्ञप्तिमा भनिएको छ, “सरकार सबैको जायज माग, चासो र सरोकार सम्बोधन गर्न तयार छ। त्यसका लागि वार्ताको माध्यमबाट समाधान खोजौं।”

हाल सामाजिक सञ्जालमार्फत् विभिन्न व्यक्ति र समूहहरूले धर्ना, जुलुस र प्रदर्शनका कार्यक्रम सार्वजनिक गरेकोप्रति मन्त्रालयले ध्यानाकर्षण भएको जनाएको छ।

भदौ २३ र २४ गतेका आन्दोलनपछि क्षतिग्रस्त संरचनाको पुनर्निर्माण हुँदै शान्ति–सुरक्षाको अवस्था सामान्य बन्दै गएको मन्त्रालयको भनाइ छ। मन्त्रालयले देशमा अस्थिरता ल्याउने स्वार्थ समूहहरू यस्ता कार्यक्रममा घुसपैठ गर्न सक्ने भन्दै आयोजकहरूलाई सचेत रहन आग्रह गरेको छ।

मन्त्रालयका अनुसार जेनजी आन्दोलनको बलमा बनेको वर्तमान सरकार फागुन २१ मा तय गरिएको निर्वाचन सम्पन्न गर्न प्रतिबद्ध छ। त्यसका लागि सरकारले निर्वाचनसम्बन्धी कानुनमा संशोधन, स्रोत–साधनको व्यवस्था, राजनीतिक दल र सरोकारवालासँग निरन्तर संवाद गरिरहेको उल्लेख गरिएको छ।

विज्ञप्तिमा भनिएको छ, “आफ्ना माग राख्दा जनताको शान्तिपूर्वक बाँच्न पाउने, सार्वजनिक सेवा प्राप्त गर्ने र निर्वाचनमा भाग लिन पाउने अधिकार कुण्ठित हुन नदिन सबै पक्ष सचेत रहनुपर्छ। सार्वजनिक र राष्ट्रिय सुरक्षामा खलल नपार्दै साम्प्रदायिक सद्भाव र राष्ट्रिय हितको प्रवर्द्धनमा सहयोग पुर्‍याउन सबैलाई अनुरोध गर्दछौं।”