जेनजी आन्दोलनका भावना बुझ्ने एकमात्र शक्ति माओवादी : प्रचण्ड

शिव कुमार ढकाल
नेशनल प्रेस कर्पोरेसन(एन पी सि),यू के
बेलायत— नेकपा माओवादी केन्द्रका अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ ले जनअधिकार (जेनजी) र माओवादी केन्द्रबीच चुनावी सहकार्य आवश्यक रहेको बताएका छन्।

महोत्तरीको रामगोपालपुरमा आयोजित एक कार्यक्रममा सम्बोधन गर्दै उनले भने, “अब जेनजी र माओवादी मिलेर चुनाव लड्नुपर्छ, अनि मात्र जेनजीका मागहरू पूरा हुन सक्छन्। अरू कसैले ती माग पूरा गर्दैनन्।”उनले प्रत्यक्ष निर्वाचित कार्यकारी, पूर्ण समानुपातिक निर्वाचन प्रणाली र समावेशी लोकतन्त्रका मुद्दा माओवादीले विगतदेखि उठाउँदै आएको स्मरण गराउँदै भने, “जो यी मुद्दाहरूको विरोधमा छन्, उनीहरूले जेनजीका भावना बुझ्न सक्दैनन्।”

प्रचण्डले जेनजी समुदायलाई आफ्नो “मित्र र बैरी” चिन्न आग्रह गरे। उनले भने, “यदि जेनजीहरूले आफ्ना साथी र विरोधी छुट्याउन सकेनन् भने त्यो देशकै दुर्भाग्य हुनेछ।”कार्यक्रममा विभिन्न राजनीतिक दल परित्याग गरी ठूलो संख्यामा व्यक्तिहरू माओवादी केन्द्रमा प्रवेश गरेका थिए। प्रचण्डले पार्टी प्रवेश समारोहमा उत्साह व्यक्त गर्दै भने, “आज खादा लगाउँदै थाक्ने गरी माओवादी प्रवेश भयो, तीमध्ये करिब ६० प्रतिशत जेनजी हुन्।”

उनले जनयुद्ध र जनआन्दोलनका समय आफू पनि जेनजीको पक्षमा उभिएको स्मरण गर्दै थपे, “हामीले जनयुद्ध र आन्दोलन गर्दा पनि जेनजीकै पक्षमा लडिरहेका थियौं। आज फेरि पनि जेनजीको भावना माओवादी केन्द्रमै प्रतिनिधित्व हुँदैछ।”

राजनीतिक विश्लेषकहरूका अनुसार प्रचण्डको यो अभिव्यक्ति आगामी चुनावमा मधेश र तराई क्षेत्रमा गठबन्धन बलियो बनाउन गरिएको राजनीतिक सन्देशका रूपमा हेरिएको छ।