वैद्यले राजनीतिक जिम्मेवारी त्यागे, अब सल्लाहकारको भूमिकामा

कुसुम शर्मा
नेसनल प्रेस कोर्पोरेसन(एन पी सि),बेलायत

बेलायत, २  कार्तिक ।
क्रान्तिकारी कम्युनिष्ट पार्टीका महासचिव मोहन वैद्य ‘किरण’ ले स्वास्थ्य समस्याका कारण पार्टी नेतृत्व छाडेका छन्। ८० वर्षीय वैद्यले करिब १० महिनादेखि राजनीतिक गतिविधिमा सक्रिय भूमिका निर्वाह गर्न नसकेपछि शनिबारदेखि औपचारिक रूपमा पार्टीको नेतृत्व सुम्पेका हुन्।

पार्टी स्रोतका अनुसार, वैद्यले स्वेच्छिक रूपमा महासचिव पदबाट राजीनामा दिएका छन्। केन्द्रीय कमिटीको शनिबार सम्पन्न बैठकले वैद्यको स्थानमा सिपी गजुरेललाई नयाँ महासचिवको जिम्मेवारी दिएको छ।नयाँ महासचिव गजुरेलले भने, “म १० महिनादेखि कार्यवाहक महासचिवको भूमिकामा थिएँ। शनिबारको बैठकले मलाई पूर्ण जिम्मेवारी दिएको छ। वैद्यज्यू स्वास्थ्य कारणले सक्रिय भूमिकाबाट पछाडि हट्नुभएको हो र अब उहाँ पार्टीका सल्लाहकार रहनुहुन्छ,” उनले सेतोपाटीसँग भने।

वैद्य नेपालको वाम आन्दोलनका वरिष्ठ नेतामध्ये एक हुन्। उनले पूर्व माओवादी आन्दोलनमा महत्वपूर्ण भूमिका खेलेका थिए र पछिल्ला वर्षहरूमा अलग संगठनमार्फत् आफ्नो राजनीतिक विचारधारा अघि बढाइरहेका थिए।

पार्टीका नेताहरूका अनुसार वैद्यले संगठनलाई नयाँ पुस्ताको नेतृत्वमा सुम्पनु नेतृत्व हस्तान्तरणको सकारात्मक उदाहरण हो। अब गजुरेलको नेतृत्वमा पार्टीले आफ्नो राजनीतिक कार्यक्रमलाई सुदृढ रूपमा अघि बढाउने तयारी गरिरहेको बताइएको छ।