‘पार्टीमा व्यापक परिवर्तन आवश्यक छ’ — कांग्रेस नेता अर्जुननरसिंह केसी

कुसुम शर्मा
बेलायत

नेपाली कांग्रेसका वरिष्ठ नेता अर्जुननरसिंह केसीले वर्तमान संरचना, विधि र नेतृत्त्वको स्वरूपसहित पार्टी जनतामा जान नसक्ने बताएका छन्।

शनिबार सानेपास्थित पार्टी केन्द्रीय कार्यालयमा पदाधिकारी र पूर्वपदाधिकारी बैठकमा सहभागी हुन पुगेका केसीले पार्टीभित्र व्यापक सुधार र पुस्तान्तरणको आवश्यकता रहेको बताएका हुन्।

उनका अनुसार, पुरानो सोच र अनुहारले कांग्रेसलाई जनतामाझ पुनः विश्वसनीय बनाउनु सम्भव छैन। “अहिलेको विधि, पद्धति र अनुहार लिएर हामी जनताको बीचमा जान सक्दैनौँ,” उनले स्पष्ट रूपमा भने, “पार्टीलाई समयको मागअनुसार रूपान्तरण गर्नुपर्छ।”

नेता केसीले युवा पुस्ताको सहभागिता पार्टीभित्र हरेक तहमा सुनिश्चित गर्नुपर्ने आवश्यकता औंल्याए। उनले भने, “म आफै पनि युवाहरूले हरेक तहमा प्रतिनिधित्व गर्नुपर्छ भनेर बोल्ने मान्छे हुँ। भोलि पनि केन्द्रीय समितिमा यही कुरा उठाउँछु।”

उनले पार्टीभित्र उर्जाशील र नयाँ सोचका व्यक्तिहरूलाई न्यूनतम रूपमा पनि सहभागी गराउनुपर्नेमा जोड दिए। “यदि हामीले युवा पुस्ताको धारणा र सोच प्रतिनिधित्व गर्न सकेनौँ भने, कांग्रेस वास्तवमा जनताको बीचमा स्थापित हुन सक्दैन,” केसीको भनाइ थियो।

केसीले कांग्रेसलाई केवल चुनावी तयारीको दल नभई संगठित, स्वतन्त्र र जनमुखी पार्टीका रूपमा पुनः स्थापित गर्नुपर्ने आवश्यकता पनि औंल्याए।