बालेन र सुदनविरुद्ध नेविसंघको उजुरी, २४ घण्टाभित्र कारबाही माग

कुसुम शर्मा
नेशनल प्रेस कोर्पोरेसन,बेलायत

२६ असोज,बेलायत — नेपाली कांग्रेसको विद्यार्थी संगठन नेविसंघले काठमाडौं महानगरपालिकाका मेयर बालेन्द्र शाह (बालेन) र ‘हामी नेपाल’ संस्थाका संयोजक सुदन गुरुङविरुद्ध औपचारिक उजुरी दर्ता गरेको छ।
नेविसंघले गत भदौ २३ र २४ गते काठमाडौंमा भएको ‘जेनजी युवा आन्दोलन’का क्रममा भएका केही अप्रिय घटनामा उनीहरू संलग्न रहेको दाबी गर्दै काठमाडौं र ललितपुर प्रहरी परिसरमा उजुरी दिएको हो।

नेविसंघका केन्द्रीय सदस्य मनीषजंग थापा, अशोकसिंह विष्ट र विजय शाहले उजुरी दर्ता गरेका हुन्। उनीहरूले आन्दोलनका क्रममा विद्यार्थीहरूलाई उक्साएको, आगजनी, तोडफोड र राष्ट्रिय सम्पदामा क्षति पुर्‍याएको आरोप लगाएका छन्। उजुरीकर्ताहरूले २४ घण्टाभित्र बालेन र सुदनलाई पक्राउ गरी निष्पक्ष अनुसन्धान थाल्न माग गरेका छन्।

नेविसंघका नेता अशोकसिंह विष्टले अनलाइनखबरसँग भने, “हामीले प्रहरीलाई स्पष्ट रूपमा भन्यौं — २४ घण्टाभित्र हामीलाई जवाफ चाहिन्छ। प्रहरीले सरकारी वकिलहरूसँग सल्लाह गरेर जानकारी गराउने बताएको छ।”

यसअघि ‘जेनजी’ आन्दोलनका क्रममा भएका घटनामा नेकपा एमाले निकट अनेरास्ववियुले पनि सुदन गुरुङसहितका युवाविरुद्ध उजुरी दिएको थियो।
त्यसैगरी आन्दोलनमा ‘दमन गरिएको’ आरोप लगाउँदै तत्कालीन प्रधानमन्त्री केपी शर्मा ओली, गृहमन्त्री रमेश लेखक लगायतका विरुद्ध पनि केही युवाले जाहेरी दिएका थिए।

राजनीतिक विश्लेषकहरूका अनुसार पछिल्ला उजुरीहरूले नेपालका विद्यार्थी संगठनहरूबीचको प्रतिस्पर्धा र ‘जेनजी आन्दोलन’ले ल्याएको नयाँ राजनीतिक गतिशीलतालाई झल्काउँछ। बालेन शाह र सुदन गुरुङ जस्ता स्वतन्त्र प्रभावशाली व्यक्तिहरूविरुद्ध औपचारिक कानुनी प्रक्रिया शुरु हुनु पनि देशको बदलिँदो राजनीतिक परिदृश्यको प्रतीकका रूपमा हेरिएको छ।