राष्ट्रपति पौडेल अस्वस्थ भएपछि अस्पताल भर्ना, स्वास्थ्य अवस्था स्थिर

कुसुम शर्मा
बेलायत
राष्ट्रपति रामचन्द्र पौडेलको स्वास्थ्य अवस्था सामान्य रहेको उनको उपचारमा संलग्न चिकित्सकहरूले बताएका छन्। शनिबार बिहान जेन–जी प्रतिनिधिहरूसँग शीतलनिवासमा भइरहेको छलफलका क्रममा अस्वस्थ भएपछि उनलाई महाराजगन्जस्थित मनमोहन कार्डियोथोरासिक भास्कुलर एण्ड ट्रान्सप्लान्ट सेन्टर (MCVTC) भर्ना गरिएको थियो।

अस्पतालका कार्यकारी निर्देशक प्रा.डा. रत्नमणि गजुरेलका अनुसार राष्ट्रपति पौडेलको प्रारम्भिक स्वास्थ्य परीक्षण सम्पन्न भइसकेको छ र हालको अवस्था स्थिर तथा सामान्य छ। “राष्ट्रपतिज्यूको स्वास्थ्यमा तत्काल कुनै जटिलता छैन, नियमित परीक्षण भइरहेको छ,” गजुरेलले सञ्चारकर्मीहरूलाई बताएका छन्।

राष्ट्रपतिलाई प्रारम्भिक जाँचपछि निगरानीमा राखिएको र आवश्यक परे थप परीक्षण गर्ने तयारी गरिएको अस्पतालले जनाएको छ। चिकित्सकहरूको टोलीले उनको रक्तचाप, मुटुको धड्कन, र अन्य जीवन संकेतहरू सामान्य रहेको जानकारी दिएको छ।

यसअघि पनि स्वास्थ्य परीक्षणका लागि पौडेलले कहिलेकाहीँ मनमोहन सेन्टरमै जाँच गराउँदै आएका छन्। शीतलनिवासका स्रोतका अनुसार राष्ट्रपति हाल आराम गरिरहेका छन् र चिकित्सकको सल्लाहअनुसार केही दिन सामान्य कार्यहरू सीमित राखिनेछ।