नेपालमा दर्ता नभएका सामाजिक सञ्जाल बन्द हुने सरकारको घोषणा

काठमाडौँ — सरकारले नेपालमा दर्ता नगरेका सामाजिक सञ्जालहरू बन्द गर्ने निर्णय गरेको छ।

फेसबुकलगायतका सामाजिक सञ्जाल प्लेटफर्महरूले नेपालमा दर्ता गर्न मन्त्रालयसँग सम्पर्क नगरेपछि मन्त्रिपरिषद्ले यस्तो निर्णय गरेको हो।

सर्वोच्च अदालतले यसअघि सामाजिक सञ्जाललाई नियमन र दर्ता गर्न सरकारलाई परमादेश दिएको थियो। त्यसैलाई आधार मानेर मन्त्रिपरिषदको निर्णय कार्यान्वयन गर्न सञ्चार तथा सूचना प्रविधि मन्त्रालय अघि बढेको सञ्चार मन्त्री पृथ्वीसुब्बा गुरूङको सचिवालयले जनाएको छ।

नेपालमा भाइबर र टिकटक भने पहिले नै दर्ता भइसकेका छन्।

मन्त्रालयको सूचना

सञ्चार मन्त्रालयले २०८२ भदौ १२ गते सार्वजनिक सूचना जारी गर्दै सामाजिक सञ्जालहरूलाई सात दिनभित्र दर्ता गर्न आग्रह गरेको थियो। तर तोकिएको समयभित्र सम्पर्क नगरेका प्लेटफर्महरूलाई नेपालभित्र निष्क्रिय पार्ने र सूचीकरण गरेसँगै पुनः सक्रिय गराइने व्यवस्था गरिएको मन्त्रालयले जनाएको छ।