प्रचण्ड–विप्लव बीच भेटघाट : समाजवादी मोर्चा र नेकपा एकता एजेन्डा प्रमुख

९ भदौ, काठमाडौं ।
नेपाल कम्युनिस्ट पार्टी (नेकपा) का महासचिव नेत्रविक्रम चन्द ‘विप्लव’ र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बीच करिब ५० मिनेट लामो भेटवार्ता भएको छ।

शनिबार बिहान प्रचण्ड स्वयम् हरिसिद्धीस्थित विप्लव निवास पुगेका थिए। निवासमा पुग्दा विप्लव स्वयं मूल ढोकामा उपस्थित भएर स्वागत गरेका थिए भने, त्यसपछि आफ्नै कार्यकक्षमा लगेर उनले आफू बस्ने सोफामा प्रचण्डलाई बसाएका थिए।

वार्तापछि प्रचण्डले नेकपाले सुरु गरेको धान खेती पनि अवलोकन गरेका थिए। यस क्रममा उनले उत्पादनसँग जोडिएको पहलको प्रशंसा गर्दै विप्लवलाई बधाई दिएका थिए।

यसअघिका भेटघाटमा विप्लव प्रचण्ड निवास जाने गर्थे। तर, यसपटक प्रचण्डकै इच्छाअनुसार विप्लवलाई भेट्न उनी आफैं निवास पुगेको प्रचण्डका प्रमुख स्वकीय सचिव गोविन्द आचार्यले बताए।

आचार्यका अनुसार भेटमा देशको वर्तमान राजनीतिक अवस्था, समाजवादी मोर्चाको गतिविधि तथा दुई पार्टीबीच सम्भावित एकताबारे छलफल भएको थियो। माओवादी केन्द्रको स्थायी समिति बैठकले हालै विप्लव नेतृत्वको नेकपासँग एकता प्रक्रिया अघि बढाउने निर्णय गरेपछि प्रचण्डले सो जानकारी विप्लवलाई गराएका थिए।

गत साउन १६ देखि १९ गतेसम्म बसेको स्थायी समिति बैठकले एकता प्रक्रियालाई औपचारिक रूपमा अघि बढाउन समिति गठन गर्ने निर्णय गरेको थियो।