बाबुराम, जनार्दन र परियार समूह वैकल्पिक शक्ति निर्माणमा एकजुट

कुसुम शर्मा
यूके नेपाल प्रेस
बेलायत , ७ मंसिर, २०८२ आइतवार— पूर्व प्रधानमन्त्री तथा नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराई, पूर्व मन्त्री जनार्दन शर्मा नेतृत्वको प्रगतिशील राष्ट्रिय अभियान, तथा सन्तोष परियार समूहबीच आज औपचारिक रूपमा एकता घोषणा हुने भएको छ।

पार्टी एकीकरणका सबै तयारी पूरा भएको नेसपा (नयाँ शक्ति) का प्रचार विभाग प्रमुख रेखी गुरुङले जानकारी दिएकी छन्। एकता घोषणाका लागि काठमाडौंस्थित राष्ट्रिय सभा गृहमा विशेष कार्यक्रम आयोजना गरिएको छ, जहाँ तीन प्रमुख राजनीतिक समूहसँगै अन्य केही वैकल्पिक समूहहरूलाई पनि समेटिने भएको छ।

यसअघि कात्तिक २८ गते तीन पक्षीय प्रारम्भिक सहमति पत्रमा हस्ताक्षर गर्दै एकताको आधार कागज तयार गरिएको थियो। आजको घोषणासभामा विभिन्न वैकल्पिक राजनीतिक दलहरू तथा नयाँ राजनीतिक शक्ति निर्माणमा सक्रिय समूहहरूलाई मात्र औपचारिक निम्तो दिइएको आयोजकले जनाएको छ।

नयाँ शक्ति पार्टीले विवेकशील साझा, नागरिक उन्मुक्ति पार्टी नेपाल तथा जेनजीसँग आबद्ध विभिन्न समूहहरूसँग पनि सम्भावित एकताको विषयमा निरन्तर छलफल भइरहेको जनाएको छ। पार्टी नेतृत्वको भनाइअनुसार “वैकल्पिक राजनीतिक शक्ति निर्माण” मुख्य उद्देश्यका साथ एकता प्रक्रिया अघि बढाइँदै छ।