ओलीकै सिफारिसमा सुशीलाको नियुक्ति भएको प्रचण्डको पुनः दाबी

कुसुम शर्मा
नेशनल प्रेस कोर्पोरेसन(एन पी सि),बेलायत
१ कात्तिक, बेलायत ।

नेकपा (माओवादी केन्द्र) का महाधिवेशन आयोजन समितिका संयोजक पुष्पकमल दाहाल ‘प्रचण्ड’ ले सुशीला कार्कीलाई प्रधानमन्त्री बनाउन नेकपा (एमाले) अध्यक्ष केपी शर्मा ओलीले पठाएको पत्र आफूले पढेको दाबी गरेका छन्।

पार्टी मुख्यालय पेरिसडाँडामा अखिल नेपाल ट्रेड युनियन महासंघद्वारा आयोजित चियापान तथा शुभकामना आदान–प्रदान कार्यक्रमलाई सम्बोधन गर्दै प्रचण्डले उक्त कुरा सार्वजनिक रूपमा दोहोर्याएका हुन्।उनले भने, “सुशीला कार्कीलाई प्रधानमन्त्री बनाउन ओलीकै सिफारिसमा पत्र पठाइएको थियो। हामीले उहाँले पठाएको चिठी आफ्नै आँखाले हेरेका हौं।”

यसअघि पनि प्रचण्डले ओलीकै लिखित सिफारिसमा सुशीला कार्की प्रधानमन्त्री नियुक्त भएको दाबी गरेका थिए। असोज २४ गते सम्पादकहरूसँगको भेटमा पनि उनले यही दाबी दोहोर्याएका थिए।प्रचण्डका अनुसार तत्कालीन प्रधानमन्त्री ओलीले राष्ट्रपति रामचन्द्र पौडेलसमक्ष सुशीलालाई प्रधानमन्त्री बनाउन औपचारिक सिफारिसपत्र पठाएका थिए।

भदौ २३ र २४ गतेको जेनजी आन्दोलनपछि ओली प्रधानमन्त्री पदबाट राजीनामा दिन बाध्य भएका थिए। त्यसपछि उत्पन्न राजनीतिक संकटको निकासका रूपमा ओलीले नै सुशीलालाई अन्तरिम सरकारको नेतृत्व दिन सिफारिस गरेको प्रचण्डको भनाइ छ।

सुशीला कार्की भदौ २७ गते प्रधानमन्त्री नियुक्त भएकी थिइन्।
त्यसबेला राष्ट्रपति कार्यालयले जारी गरेको प्रेस विज्ञप्तिमा ‘तत्कालीन प्रधानमन्त्रीको सिफारिस र सम्मतिको आधारमा’ कार्कीलाई नियुक्त गरिएको उल्लेख थियो।यद्यपि उक्त सिफारिसपत्र सार्वजनिक भएको छैन, तर राष्ट्रपति कार्यालयको विज्ञप्तिले ओलीकै सहमतिको आधारमा नियुक्ति भएको पुष्टि गरेको छ।प्रचण्डले भने आफू र आफ्ना सहकर्मीहरूले त्यो सिफारिसपत्र प्रत्यक्ष रूपमा हेरेको र पढेको दाबी गर्दै पुनः एकपटक ओलीमाथि राजनीतिक आरोप दोहोर्याएका छन्।

उनको भनाइले एमाले र माओवादीबीच पुनः राजनीतिक बहस चर्किने संकेत दिएको छ।