काठमाडौंका सार्वजनिक स्थानमा धूमपान गर्नेहरूमाथि ५०० रुपैयाँ जरिवाना लागू

शिव के. ढकाल
www.uknepalpress.com | National Press Corporation (NPC)
United Kingdom

काठमाडौं महानगरपालिकाले सार्वजनिक स्थलमा धूमपान गर्ने व्यक्तिमाथि ५०० रुपैयाँ जरिवाना असुल्न थालेको छ। आइतबारदेखि सुरू भएको कारबाहीअन्तर्गत हालसम्म १७ जनाले जरिवाना तिरेका छन्।

नगर प्रहरी प्रमुख राजुनाथ पाण्डेका अनुसार आइतबार मात्रै ८ हजार ५०० रुपैयाँ उठाइएको छ। यसअघि महानगरले साउन मसान्तसम्म जनचेतनामूलक अभियान सञ्चालन गरेपनि अब प्रत्यक्ष जरिवाना असुल्न थालिएको उनले बताए।जरिवाना तत्काल तिर्न सक्ने सुविधा नगर प्रहरीले क्यूआर स्क्यानमार्फत उपलब्ध गराएको छ। अनलाइन सेवा प्रयोग गर्न नसक्नेहरूको हकमा रकम प्रहरीले उठाएर खातामा बुझाइने व्यवस्था गरिएको छ।

महानगरका सहप्रवक्ता ध्रुव काफ्लेले यो कदम २०६८ सालको सूर्तिजन्य पदार्थ (नियन्त्रण तथा नियमन) ऐन कार्यान्वयन गर्ने प्रक्रियाको हिस्सा भएको स्पष्ट पारे। “सार्वजनिक स्थानमा धूमपानले अरू मानिस, विशेषगरी बालबालिकामा असर गर्ने भएकाले हामीले नियमनलाई कडाइका साथ अघि बढाएका हौं,” उनले भने।काफ्लेले महानगरले धूमपानलाई पूर्णरूपमा निषेध नगरेको तर तोकिएका स्थानबाहेक प्रयोग नगर्न आग्रह गर्दै थपे, “सुरूमा चेतावनी र सचेतनामूलक कार्यक्रम गरिएका थिए। अहिले भने कानुनअनुसार कडाइका साथ कार्यान्वयन गरिएको हो।”