नेकपाले जेनजीसँग संवाद र सांस्कृतिक प्रस्तुति थालेको घोषणा

कुसुम शर्मा
यूके नेपाल प्रेस
बेलायत , ६ मंसिर, २०८२ शनिवार— नेपाली कम्युनिस्ट पार्टी (नेकपा) ले जेनजी समूहसँग पेरिसडाँडास्थित केन्द्रीय कार्यालयमा विशेष कार्यक्रम आयोजना गरेको छ। शनिबार दिउँसो सुरु गरिएको कार्यक्रममा पार्टी अध्यक्ष एवं संयोजक पुष्पकमल दाहाल ‘प्रचण्ड’ सहित शीर्ष नेताहरू सहभागी भए।

कार्यक्रममा उपाध्यक्ष नारायणकाजी श्रेष्ठ, नेता शक्ति बस्नेत, जगन्नाथ खतिवडा लगायतका केन्द्रीय सदस्यहरू उपस्थित थिए। पार्टी नेतृत्वसँगै जेनजी समूहका प्रतिनिधि, जेनजी रेड फोर्सका सदस्य तथा ठूलो संख्यामा कार्यकर्ताहरूले सहभागिता जनाएका छन्।

नेकपाले हालसालै राजनीतिक क्षेत्र, युवा परिचालन तथा सांस्कृतिक सम्बोधनमार्फत नयाँ पुस्तासँगको संवादलाई विस्तार गर्ने प्रयास गर्दै आएको छ। सोही सन्दर्भमा आयोजित कार्यक्रमलाई पार्टीले ‘जेनजीसँग साझेदारी र संवादको नयाँ पहल’ का रूपमा व्याख्या गरेको छ।

कार्यक्रममा सांस्कृतिक प्रस्तुति, भाषण तथा संवाद सत्र समावेश गरिएको प्रचण्डको सचिवालयले जानकारी दिएको छ।नेताहरूले नयाँ पुस्ताको चासो, असन्तोष र राजनीतिक वित्तीयनमा उनीहरूको भूमिकाबारे छलफल गरेका छन् भन्ने उच्च स्रोतले बताएको छ।

पेरिसडाँडामा भएको कार्यक्रमलाई धेरैले नेकपाको तर्फबाट नयाँ पुस्तासँगको प्रत्यक्ष संवाद र राजनीतिक सान्दर्भिकता निर्माण गर्ने प्रयासका रूपमा हेरेका छन्।