अदालत आगजनी प्रकरणमा सर्वोच्चले प्रहरीमा जाहेरी दर्ता गरायो

कुसुम शर्मा
यूके नेपाल प्रेस
बेलायत , १८ कार्त्तिक — भदौ २४ गते देशभरका अदालतहरूमा भएको आगजनी र तोडफोड घटनाको अनुसन्धानका लागि सर्वोच्च अदालतले काठमाडौं जिल्ला प्रहरी परिसरमा औपचारिक जाहेरी दर्ता गरेको छ।

सर्वोच्च अदालतले कात्तिक १३ गते जिल्ला प्रहरी कार्यालयलाई पत्र पठाउँदै घटनामा संलग्न व्यक्तिहरूको पहिचान गरी कारबाही अघि बढाउन आग्रह गरेको थियो। जाहेरीमा कसैको नाम किटान गरिएको छैन।

जाहेरी दर्ता भएपछि जिल्ला प्रहरी परिसरले अनुसन्धान सुरु गरिसकेको प्रहरी वरिष्ठ उपरीक्षक (एसएसपी) रमेश थापाले पुष्टि गरे।

यसैबीच, कात्तिक १४ गते काठमाडौं जिल्ला अदालतले पनि जाहेरी बुझाएको छ। स्रेस्तेदार तीर्थराज भट्टराईका अनुसार भवन र अन्य सामग्रीसहित करिब ६२ करोड रुपैयाँ बराबरको क्षति भएको उल्लेख गर्दै जाहेरी दर्ता गरिएको हो।

भदौ २४ गतेको घटनामा सर्वोच्च अदालतसहित देशभरका २२ वटा अदालतमा आगजनी र तोडफोड भएका थिए। सर्वोच्चले मातहतका अदालतहरूलाई पनि स्थानीय प्रहरी कार्यालयमा जाहेरी दर्ता गर्न निर्देशन गरेको छ।

हाल अधिकांश अदालतहरूले जाहेरी दिने तयारी गरिरहेका छन्। उच्च अदालत तुलसीपुरका रजिस्ट्रार यमप्रसाद बास्कोटाका अनुसार त्यहाँ मात्र २८ करोड रुपैयाँ बराबरको क्षति भएको अनुमान छ। उनले भने, “हामीले घटनासम्बन्धी भिडियोहरू संकलन गरेर प्रमाणका रूपमा बुझाउने तयारी गरिरहेका छौं।”

काठमाडौं, बाँके, रूपन्देही, मोरङ, सिराहा, सप्तरी, कैलाली, कास्की, मकवानपुर, दाङ, तनहुँ, चितवन, कपिलवस्तु र सिन्धुलीलगायतका जिल्लाका अदालतहरूमा समेत क्षति पुगेको छ।