राजा चार्ल्सको निर्णय : राजकुमार एन्ड्रूको उपाधि हटाइयो, राजकीय निवास छाड्न निर्देशन

कुसुम शर्मा
यूके नेपाल प्रेस
बेलायत , १४ कात्तिक — ब्रिटेनका राजकुमार एन्ड्रूले आफ्नो ‘राजकुमार’ उपाधि गुमाएका छन्। राजा चार्ल्स तृतीयले भाइप्रति गरेको यो कदम राजपरिवारमा ठूलो निर्णयको रूपमा हेरिएको छ।

एन्ड्रूले अबदेखि एन्ड्रू माउण्टब्याटन–विन्ड्जर नाम प्रयोग गर्नेछन्। साथै, उनलाई विन्डसरस्थित राजकीय निवास ‘रोयल लज’ पनि छाड्नुपर्ने भएको छ।

बकिङ्घम प्यालेसले बिहीवार साँझ एक विज्ञप्ति जारी गर्दै “राजाबाट एन्ड्रूका राजकीय पद, उपाधि र सम्मानहरू हटाउने औपचारिक प्रक्रिया सुरु भएको” जनाएको हो।

एन्ड्रूको नाम अमेरिकी व्यवसायी जेफ्री एप्स्टिनसँग जोडिएपछि विवाद चर्किएको थियो। एप्स्टिनलाई एक नाबालिगलाई यौन व्यवसायमा लगाउने आरोपमा दोषी ठहर गरिएको थियो।

हालै मरणोपरान्त प्रकाशित आत्मकथामा भर्जिनिया जूफ्रेले किशोरी हुँदा राजकुमार एन्ड्रूसँग तीन पटक यौन सम्बन्ध भएको दाबी गरेकी थिइन्। एन्ड्रूले भने यी सबै आरोपहरूलाई “पूर्ण रूपमा अस्वीकार” गर्दै आएका छन्।जूफ्रेको परिवारले भने, “उनले आफ्नो सत्य र साहसिक आवाजले एक ब्रिटिश राजकुमारलाई उपाधिविहीन बनाइन्।”

राजदरबारको वक्तव्य

राजदरबारले विज्ञप्तिमा भनेको छ, “राजकुमार एन्ड्रूका राजकीय पद, उपाधि र सम्मानहरू औपचारिक रूपमा हटाइनेछ र उनलाई ‘रोयल लज’ निवास छोड्न सूचना दिइएको छ।”

अब एन्ड्रू स्यान्ड्रिङ्घम इस्टेटस्थित निजी आवासमा सर्ने तयारीमा छन्।दरबारले थप उल्लेख गरेको छ, “राजदरबार पीडितहरूप्रति ऐक्यबद्ध छ र सबै प्रकारका दुर्व्यवहारविरुद्ध स्पष्ट सन्देश दिन चाहन्छ।”