लगातार वर्षापछि त्रिभुवन विमानस्थलका उडान स्थगन, काठमाडौँ भित्रिने–निष्काशन सवारी रोक

कुसुम शर्मा
नेसनल प्रेस कर्पोरेसन
बेलायत

काठमाडौँ – अविरल वर्षाका कारण त्रिभुवन अन्तर्राष्ट्रिय विमानस्थलका सबै आन्तरिक उडानहरू अस्थायी रूपमा स्थगन गरिएका छन्।

विमानस्थलका महाप्रबन्धक हङ्सराज पाण्डेका अनुसार बिहानदेखिको लगातार वर्षाका कारण काठमाडौँ, भरतपुर, जनकपुर, भद्रपुर, पोखरा र तुम्लिङटारतर्फका उडानहरू रोकिएका छन्।

“मौसमी अवस्थाको निरन्तर पुनरावलोकन भइरहेको छ। अन्तर्राष्ट्रिय उडानहरू भने सुचारु छन्, तर अविरल वर्षाको बीचमा आन्तरिक उडान सञ्चालन जोखिमपूर्ण हुने भएकाले तत्कालका लागि स्थगन गरिएको हो,” पाण्डेले भने।

जल तथा मौसम विज्ञान विभागका अनुसार देशभर अहिले व्यापक वर्षा भइरहेको छ र आजदेखि भोलिसम्म भारीदेखि अति भारी वर्षा हुने चेतावनी जारी गरिएको छ। विभागले रातिको समयमा वर्षा अझ बढ्ने सम्भावना औंल्याएको छ।

तीन दिनका लागि उपत्यका प्रवेश–निष्काशन सवारी आवागमन रोक

त्यस्तै, बढ्दो वर्षा र त्यसबाट उत्पन्न हुन सक्ने बाढी, पहिरो र डुबानको जोखिमलाई ध्यानमा राख्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले काठमाडौँ उपत्यका भित्रिने र बाहिरिने सबै सवारी साधन तीन दिनका लागि बन्द गर्ने निर्णय गरेको छ।

प्राधिकरणकी प्रवक्ता शान्ति महतद्वारा जारी विज्ञप्तिमा भनिएको छ,

“भारी वर्षाका कारण आउन सक्ने सम्भावित बाढी, पहिरो र डुबानबाट जोखिम न्यूनीकरणका उद्देश्यले कोशी, मधेश, बागमती, गण्डकी र लुम्बिनी प्रदेशका सबै जिल्लाबाट सञ्चालनमा रहेका लामो दूरीका सवारी साधन तथा काठमाडौँ उपत्यका भित्रिने/बाहिरिने सवारी साधनको आवागमन असोज १८ देखि २० गतेसम्म पूर्ण रूपमा बन्द गरिएको छ।”

विभागका अनुसार पूर्वको कोशी प्रदेशदेखि पश्चिमको लुम्बिनी प्रदेशसम्म हाल मध्यमदेखि भारी वर्षा भइरहेको छ। असोज २० गतेसम्म केही स्थानमा अति भारी वर्षा हुने सम्भावना पनि रहेको छ।

प्राधिकरणले सम्बन्धित जिल्लाका प्रमुख जिल्ला अधिकारीहरू र सुरक्षा निकायहरूलाई सवारी आवागमनमा पूर्ण निगरानी गर्न निर्देशन दिएको छ। साथै, सर्वसाधारणलाई अत्यावश्यक कारण बाहेक लामो दूरीका यात्रा नगर्न आग्रह गरिएको छ।