नक्कली भुटानी शरणार्थी प्रकरण : कार्कीको इजलासमा अन्तिम बहस आरम्भ

यूके – नेपाल प्रेस
बेलायत
काठमाडौं जिल्ला अदालतमा नक्कली भुटानी शरणार्थी प्रकरणको अन्तिम सुनुवाइ बुधबारदेखि सुरु भएको छ। न्यायाधीश धुव्रराज कार्कीको इजलासमा पेशी तोकिएपछि ३३ जना प्रतिवादीमाथि अन्तिम चरणको बहस सुरु भएको हो।

यो प्रकरण सन् २०१९ मा तत्कालीन गृहमन्त्री रामबहादुर थापा ‘बादल’ को पालामा गठित कार्यदलबाट सुरु भएको ठहर अनुसन्धानले गराएको छ। पूर्वसहसचिव बालकृष्ण पन्थीको संयोजकत्वमा बनेको कार्यदलमार्फत नक्कली नाम थपेर नेपाली नागरिकलाई भुटानी शरणार्थीको रुपमा अमेरिका पठाउने योजनामा करोडौं रुपैयाँ असुलिएको देखिएको छ।

प्रहरी अनुसन्धानअनुसार, यस प्रक्रियामा विभिन्न राजनीतिक र प्रशासनिक तहका उच्च व्यक्तिहरु संलग्न देखिएका थिए। प्रारम्भिक उजुरीका आधारमा पहिलो चरणमा ३० जनाविरुद्ध मुद्दा दर्ता भएको थियो भने, पछि थप उजुरी आएपछि प्रतिवादी संख्या ३३ पुगेको छ।

हालसम्म पक्राउ परेकामध्ये ११ जना पुर्पक्षका लागि कारागारमा, सात जना धरौटीमा रिहा, र चार जना साधारण तारेखमा बाहिर रहेका छन्। प्रतिवादीमध्ये पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँण, बादलका छोरा प्रतिक, तत्कालीन सुरक्षा सल्लाहकार इन्द्रजित राई, र कांग्रेस नेता आङटावा शेर्पा लगायतका उच्चप्रोफाइल व्यक्तिहरु सामेल छन्।

तर, यो प्रकरणमा ११ जना अझै फरार छन्। फरार हुनेमध्ये राजनीतिक सल्लाहकारका परिवार सदस्यदेखि अमेरिकामा बस्दै आएका व्यक्तिहरूसम्मको नाम प्रहरीले सार्वजनिक गरिसकेको छ।

अदालतले प्रतिवादीमाथि ठगी, राज्यविरुद्ध अपराध र संगठित अपराधसहितका विभिन्न मुद्दा चलाइरहेको छ। अब हुने अन्तिम बहसपछि यस बहुचर्चित प्रकरणको फैसला नजिकिँदै गएको छ।