प्रधानमन्त्री ओलीसँग भारतीय विदेश सचिव मिश्रीको शिष्टाचार भेट

शिव के ढकाल
बेलायत— नेपाल भ्रमणमा आएका भारतीय विदेश सचिव विक्रम मिश्रीले आइतबार प्रधानमन्त्री केपी शर्मा ओलीसँग शिष्टाचार भेट गरेका छन्।

दुईदिने औपचारिक भ्रमणका लागि परराष्ट्र मन्त्रालयका सचिव अमृतबहादुर राईको निमन्त्रणामा काठमाडौँ पुगेका मिश्रीले सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री ओलीसँग भेटवार्ता गरेका हुन्।

भेटका क्रममा प्रधानमन्त्रीका प्रमुख सल्लाहकार विष्णुप्रसाद रिमाल, परराष्ट्र मन्त्रालयका वरिष्ठ अधिकारीहरू तथा नेपालस्थित भारतीय राजदूत पनि उपस्थित थिए।

परराष्ट्र मन्त्रालयका अनुसार, भारतीय विदेश सचिव मिश्रीले आजै राष्ट्रपति रामचन्द्र पौडेल, नेपाली कांग्रेसका सभापति शेरबहादुर देउवा, परराष्ट्रमन्त्री डा. आरजु राणा देउवा र प्रमुख प्रतिपक्षी दलका नेता पुष्पकमल दाहालसँग छुट्टाछुट्टै भेटवार्ता गर्ने कार्यतालिका तय भएको छ।

यस भ्रमणलाई नेपाल–भारतबीच उच्चस्तरीय संवादलाई निरन्तरता दिने अवसरका रूपमा हेरिएको छ। यद्यपि, भेटवार्तामा उठाइने प्रमुख एजेन्डाबारे आधिकारिक जानकारी दिइएको छैन।